蘋果日報 | APPLE DAILY
› 選擇地區
三藩市
紐約
洛杉磯
其他美國地區
2009年07月24日

隔牆有耳:抽水哥紮職冇槍陀 - 李八方

設計圖片

澳門近年怨氣谷到爆,鏵哥冇符,崔世安頭痛。07年五一勞動節大遊行秩序失控,向天開槍示警嘅便衣探員「抽水哥」一舉成名,事後佢要繳械並調往刑事調查廳車務管理科,負責司法警察局車輛調配、維修、保養同洗車等工作。事隔兩年,八方聽聞抽水哥近日紮職,升為首席警員。

通過考核升為四柴

澳門司警定期舉行內部考核試,警員可主動參加,澳門警界人士透露,現年約33歲,原名許永聰嘅抽水哥早前通過考核晉升為首席警員,俗稱「四柴」,大約相等於香港警察沙展級數,月薪由約17,000蚊加至20,000蚊左右。
開槍事件後抽水哥被調到車房做文職,當更唔使陀槍,有時或者要揸水槍洗車,據講今趟升職做咗車房主任,唔單止唔使陀槍,分分鐘用水槍都唔使勞煩佢,事關洗車、抹車呢啲操重工夫有下屬代勞,陀慣槍嘅抽水哥,唔知有冇覺得技癢?
據了解原籍福建嘅抽水哥92年加入司警,開槍前隸屬澳門第一警司處,主要負責監視及搜集情報,日常處理「貴利」案同金額少於500蚊嘅爆竊案等輕微案件,當差多年鮮有應付重大case。今次升職是否意味佢有機會重返前線,有司警人員話暫時未知,而喺澳門當差,由最基層警員做起,不論功績一般做滿20年就可以升做四柴,抽水哥通過升級試,至少顯示佢仕途冇受好大障礙,相信開槍事件已經閂快勞。
兩年前開槍事件中,一名市民被點三八口徑子彈所傷,澳門司法警察局調查半年後,表示不能證實槍傷係咪由抽水哥佩槍子彈造成,令事件更加迷離;澳門保安司司長張國華則力撐抽水哥開槍有理,認為當時情況緊急,為避免導致第三者危險,抽水哥屬合法開槍,冇迹象顯示佢有不正當動機,亦冇違反相關守則,因此僅列作「一般鳴槍事件」算數。

槍傷市民收400萬元

抽水哥順利升職,上述無辜受傷市民亦有後福,坊間盛傳有熱心人慷慨送贈400萬元作慰問金兼「湯藥費」,促進澳門穩定和諧,真正皆大歡喜。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載