› 選擇地區
三藩市
紐約
洛杉磯
其他美國地區
香港 台灣 北美
 
2009年05月17日

隔牆有耳:票少少 扮代表 - 李八方

設計圖片

貴為人大常委,身為人大代表嘅人,唔可以代表人民講平反六四真話;香港特區首長,自認唔可以代表香港人,更加要道歉認衰,呢個世界,都算奇怪。煲呔喺立法會亂噏「代表香港人」,令泛民憤而離場,好多人都不滿呢番扮代表言論,向來敢言嘅導演杜琪峰前晚出席首屆《鮮浪潮短片展》揭幕禮,被問到特首是否代表佢時,頓時扯火,指煲呔只係小圈子選舉特首,大言不慚令人失笑。

只係小圈子選舉產物

杜Sir講得無錯喎,推選特首嘅選舉委員會得800個人有份投票,攞晒都係贏800票,何況煲呔07年競選連任時只有649票,得咁少票,係真正小圈子選舉產物,梗係冇資格代表香港人啦,「如果佢係我哋普選出嚟嘅,佢可以代表我哋,不過佢又唔係。」
《神探》劉青雲話查案用右腦,不要用左腦,煲呔有腦,可惜講說話卻唔經大腦,左右腦都唔用,杜Sir都恥笑佢衰咗要道歉好瘀,「國家會有人去處理呢啲問題,大家記得有六四咪得,特首知講錯嘢,佢都道歉啦,佢知錯嘅,好過唔睬你呀。」
大家唔使奇怪點解杜琪峰咁㷫,事關佢言論素來火爆,全國政協汪阿姐申請北九裁判署做八和會址落選,大鬧政府偏心,杜琪峰寸阿姐「阻住地球轉」;年前國際猛片《蝙蝠俠──黑夜之神》來港取景,政府全力支援,畀飛機中環低飛,又派大批警員封路,杜Sir當時有狂鬧政府歧視,「(外國片)政府就百分百支持,我哋拍片政府就做唔到啦,百分一都冇!我哋係中國人,唔值錢!」
杜Sir出席短片揭幕禮後,坐夜機出席康城影展,家陣人人聞豬流感色變,搭飛機直情係高風險動作,杜Sir卻大安旨意,口罩都冇戴,「家連眼睛都話入到細菌,有啲嘢冇得避,睇吓好唔好彩,如果要我隔離七日,咪惟有當放假靜吓囉。」
真正要搵地方避靜嘅應該係煲呔,家人人都話「曾蔭權不代表我」,成咁,佢唔匿埋都冇面見人,上次旺角有人淋鏹水落街,佢即刻到場視察,噚日卻唔見人,唔通正在用右腦緝兇?

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載