› 選擇地區
三藩市
紐約
洛杉磯
其他美國地區
香港 台灣 北美
 
2009年04月12日

隔牆有耳:我們都是選特首的 - 李八方

口頭禪「第N屆都唔選特首」嘅行會召集人梁振英CY,留下N+1呢條代數畀香港人推測,呢個謎可能有眉目拆解。《南華早報》噚日指CY已私下同人講會參選下屆特首,仲可能已向中央領導人探口風;CY例牌否認,不過空穴來風必有因,CY、唐英年同曾俊華跑馬仔大騷萬眾期待,隨時媲美草蜢出年25周年演唱會。

CY向民主派示好

唔少政壇中人都認為CY去馬昭然若揭,大半年前佢不理行會集體負責制,搶先開腔支持最低工資立法,又不斷撰文就振興香港經濟發表意見,早前更帶領本地專業人士去台北交流,比德成局長更快「登陸」台灣。
上兩個星期民主黨15周年黨慶聚餐,CY罕有畀面出席,而且冇快閃留低食埋餐飯,目的係競投華叔墨寶捐錢畀民主黨。需知道華叔係支聯會主席,今年又係六四20周年,CY特登買佢墨寶,示好意味甚濃,當然買幅書法唔等於洗底,CY與民主黨關係如何發展,有待觀察。
人緣麻麻一向被視為CY選特首死穴,有老愛國指出,同面面俱圓嘅唐英年比較,CY無疑差一截,但與鬍鬚曾比較,CY卻不見得很輸蝕,只要佢加以改善,未必不能扭轉別人看法。一個親北京議員則同八方講,本地政界冇人排除過CY選特首可能性,近期煲呔政府弱勢,唐英年、鬍鬚曾民望危危乎,趁佢病攞佢命,CY快馬加鞭係正常策略,不過佢話暫時未聽聞北京祝福任何人訊息。
八方相信CY短期內唔會明確表態,繼續猶抱琵琶風花雪月,佢喺自己個blog度話近日到訪紐約同華盛頓時,趕上櫻樹開花尾聲,可惜華盛頓翻風,吹下遍地落櫻,樹上頓顯凋零,佢不禁吟咗杜甫首《曲江二首.其一》解愁:「一片飛花減卻春,風飄萬點正愁人。」
有人指杜甫寫呢首詩,係要抒發不被朝庭重用嘅抑鬱煩悶,如果CY真係已經向北京領導人探口風,憑詩寄意,有無微言大義?CY只係引用呢首詩首兩句,最後兩句自勉睇開啲,「細推物理須行樂,何用浮名絆此身」,佢冇寫埋出嚟。
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載