› 選擇地區
三藩市
紐約
洛杉磯
其他美國地區
香港 台灣 北美
 
2008年12月24日

隔牆有耳:青樓名妓賣埋身 - 李八方

堅守防線多年,青樓名妓終於失身。亞視執行主席張永霖做電盈高層時,自嘲係青樓名妓賣藝不賣身,噚日佢為著作《成功路》開讀者分享會,慨嘆今時唔同往日,入咗亞視後唔可以再吊高嚟賣,日後要賣藝又賣身,台前幕後都要做,提供一條龍服務。

瞓身上陣改革亞視

能夠令名妓獻身,張永霖話今次係講心唔講金,加入亞視係為咗幫朋友,既然好朋友咁信任佢,佢自然義不容辭,正所謂士為知己者死,為咗恩客,青樓名妓賣埋身又點話?張永霖噚日透露,自己今次會瞓身上陣,更向亞視上上下下發出最後通牒,講到明今次可能係亞視改革最後機會,不成功便成仁,所以佢都要拋頭露面,日後可能會同藝員一齊出席宣傳活動,甚至唔排除做埋幕前,主持、演員一腳踢,有人問佢會否開拍《亞視十二日維新風雲》兼做主角,佢笑言:「如果連呢套都唔拍,我都冇乜好拍。」
電視台高層出鏡早有先例,無綫陳志雲樂此不疲,喺娛樂版見報率媲美明星,花邊新聞精采過旗下藝員,如果張永霖真係賣藝又賣身,相信吸引力唔輸蝕過陳總。張永霖噚日唔肯透露亞視日後如何革新,只係話會同之前完全唔同,會走創新、大膽路線,唯一露口風係講到電視台近年好多講股節目時,佢話唔認同一啲教散戶買窩輪、衍生工具嘅節目,因為呢啲係好專業嘅投資行為,喺電視隨隨便便講幾句十分牙煙,佢唔希望亞視係咁嘅電視台。至於是否繼續做中央台,佢唔答。
亞視12日維新風雲充滿戲劇性,內情肯定十分精采,不過張永霖話由於已簽咗保密協議,所以日後都未必可以隨便爆料,只係強調同魔童仍然有偈傾,幾日前星期日都有見面,兩人仲係朋友。對於呢次事件誰勝誰負,佢話好難講,更以當年香港電訊放棄長途電話專營權為例,指雖然王維基嘅城電成功搶佔市場,不過香港電訊都獲政府賠番67億港元,可以話係各取所需,難言輸贏。
政府稍後拍賣三條流動電視頻譜,張永霖話未決定係咪競投,佢認為電視未來一定要循多媒體方式營運,先有生存空間。
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載