› 選擇地區
三藩市
紐約
洛杉磯
其他美國地區
香港 台灣 北美
 
2008年12月11日

隔牆有耳:發哥幫拖 靚姐笑呵呵! - 李八方

設計圖片

禽流感殺到,街市一片愁雲慘霧。平日活雞交投暢旺嘅九龍城街市,噚日成排雞檔變得水盡鵝飛,個個檔主塊面黑過包公。呢個時候,遠處飄來一個熟悉嘅身影,呢個人雙手插袋笑騎騎,街市啲檔主即時笑晒口湧出嚟夾道歡迎。引起騷動嘅原來係發哥周潤發,佢專登嚟為人稱「靚姐」嘅活雞檔檔主玲姐打氣。
發哥係玲姐熟客,噚日朝一到街市就去同玲姐sayhi。發哥一身便服,仲成腳泥,似乎啱啱去完郊外行山。玲姐見發哥咁捧場,傾兩句就提到生意差,又同在場記者講自己申請冰鮮牌仲未批,𠵱家每日都蝕緊錢。

讚冰鮮雞都好食

發哥同八方講,今次唔係嚟買雞,只係嚟探老友玲姐,「我鍾意食魚,少食雞。平時玲姐叫我買,我咪買番幾隻囉。」佢又即刻童軍上身,為玲姐幫拖,大讚冰鮮雞好食,「冇活雞食,咪食冰鮮雞囉,都新鮮嘅。炸雞髀用凍雞,都好好食,細路仔都食到津津有味。係傳統人要食鮮雞咁啫。」發哥撐場留咗10幾分鐘先走人。跟住無綫午間新聞播出發哥撐玲姐嘅報道。咁啱得咁蹺,玲姐早兩個月入紙申請,但一直冇回音嘅冰鮮牌,食環署下晝就派人親自去玲姐個檔,正式發牌准佢今日開始賣冰鮮雞。
玲姐都好識做,一改朝早嗰種經歷漫長等待嘅無奈,話等兩個月攞牌屬正常程序,仲立即入定十幾廿隻冰鮮雞,預留畀熟客。八方有同事將玲姐嘅好消息打電話轉告發哥,佢話:「係咩?攞到牌嗱,真係好戥玲姐開心。」聽聲都知發哥笑晒,「我哋識咗好多年,真係老街坊咁㗎。」

感政府進退失據

至於有冇覺得食環署遲鈍,發哥都好厚道,唔想講到咁具體,只係話同好多市民感覺一樣,「(政府)好多方面都進退失據,吓吓等全世界鬧到嘈晒先至改,之前諮詢做好啲就唔會搞成咁啦。」唉,發哥鍾意放低國際影星身份,周圍去探街坊,但唔通次次都要靠佢將市民苦況講出嚟,政府部門先識跟進?遲啲發哥出埠拍戲,咁街坊有問題咪冇人幫手?

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載