› 選擇地區
三藩市
紐約
洛杉磯
其他美國地區
香港 台灣 北美
 
2008年10月21日

隔牆有耳︰民建聯有個屈員 - 李八方

設計圖片

立法會噚日上演「雷曼苦主現形記」,皆因有傳媒煞有介事,攞返上星期開會時,甘乃威同余若薇申報利益嘅舊聞嚟炒作,雖然甘、余二人一早澄清事件,包括甘威買嘅係瑞銀發行、渣打分銷嘅股票掛鈎票據(ELN),同雷曼根本冇任何關係;余若薇亦重申,開會時已申報咗利益,唔覺有任何利益衝突。

屈甘乃威買雷曼產品

早前提出用公帑為雷曼苦主包底,搞到劣評如潮嘅立法會第一大黨民建聯,黨主席譚耀宗噚日一反近日喺雷曼事件上嘅低調作風,即時撲出嚟咬住唔放,話喺佢記憶中余若薇同甘乃威會上冇申報,仲話據佢了解,甘威買嘅產品同雷曼有關。記者見譚耀宗講到咁肯定,都追問點解咁心水清,點知問唔夠兩句,佢先至話啲料原來只係嚟自一份報紙報道。結果越問越縮,譚耀宗由本來一味老屈,最後要改口,話要查番立法會紀錄,先至確定余大狀同甘威有冇申報。
民記副主席葉國謙嘅講法,就同黨主席好唔同,佢話覺得作為立法會議員,係代表好多選民,只要討論嘅問題係關乎大眾,即係分分鐘關係到過千同過萬市民,議員就有責任要表達。正當大家都唔明點解佢口氣比主席鬆咁多,葉國謙講講吓,露口風話一間佢相熟學校原來都中咗招,但佢唔覺有需要申報。有記者好奇怪民建聯咁多錢放銀行,有冇涉及雷曼相關產品,葉國謙就話好難答呢個問題,又話唔覺得有需要向傳媒公開黨產存款點樣運作喎。

長毛逆思考利益衝突

社民連長毛自爆,銀行戶口長期只有一萬蚊,根本冇錢買雷曼迷債,又話大家捉邊個立法會議員係雷曼苦主,根本係捉錯用神,因為苦主作為受害者,追討退款好正常,反而大家應該睇吓邊個議員喺「三行六保」有職位,「幫苦主有乜問題,同呃人嗰啲機構有關先有問題!」
至於新丁樓王謝偉俊就冇買雷曼相關產品,反而白姐姐買過ELN,不過早前已經放咗,冇乜損手。葉劉就話有個堂家姐中咗招,但由於唔係直系親屬,所以唔申報都冇問題。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載