› 選擇地區
三藩市
紐約
洛杉磯
其他美國地區
香港 台灣 北美
 
2008年06月26日

隔牆有耳:風大雨大我走先 - 李八方

獲阿松力薦加入政府嘅肥馬,六年前喺一個高掛8號波嘅日子鞠躬道歉,大家以為佢係短途馬,原來佢韌力十足可以跑長途,董落曾上都有得留低,可惜發現隱疾要提早離場。六年後佢公佈辭職,巧合地又係一個8號風球襲港嘅日子,近排香港天氣惡劣,煲呔政府更陷入風雨飄搖之勢,特首民望急挫跌穿60分,風大雨大之際肥馬堅持離開,難免令人諸多聯想。
肥馬噚日喺記者會,誓神劈願話辭職完全係因為健康問題,然而佢呢個病冇即時生命危險,咁講唔易令人信服,佢一於講「耶穌」以示別無用心。肥馬強調決定辭職前,同家人商討過無數次,大家仲一齊祈禱,令佢心存平安,所以就算知道個腦有事,都冇愁眉苦臉、憂心忡忡,甚至覺得因禍得福,「當然呢啲咁嘅禍,我都唔想見到。我𠵱家係完全冇事,行得、食得、飲得、打得,我指係打波。」
佢又話得悉患病過程係神嘅安排,本來係醫久咳,照肺後醫生提議佢做埋其他檢查,結果「隨便」照埋個腦,就發現呢個隱疾,「如果唔係呢個安排,冇可能發現到。」神安排佢知道身患隱疾,肥馬好似牧師鼓勵信徒咁,大講做人道理,以仙股事件為例,話遇到挫折都唔可以氣餒,要喺逆境中求生路,「彩虹係喺大雨後先會出現。」

望有更多時間事奉教會

肥馬感謝神恩,佢話要多謝佢老婆,因為佢太太係虔誠基督徒,精神上畀佢好大支持,而佢兩個女亦好關心佢。佢又透露大女本來係一個牧師,最近先卸任,不過將來會繼續喺教會事奉,佢自己亦希望花多啲時間做教會工作,更話已經有唔少人邀請佢做見證,藉講述發現患病神奇過程,去鼓勵人信教。
開口埋口講神,有行家話噚日個記者會都幾似宣教佈道會,相信肥馬日後輕易勝任做見證工作。佢忙於事奉教會,唔知有冇時間應酬政客,事關各黨派都話要歡送佢,自由黨林健鋒話已約肥馬星期日打golf,民主黨就約定佢去鯉魚門食海鮮,作為歡送宴,不過肥馬話要節制飲食,又唔可以多飲酒,呢餐歡送海鮮餐,相信要就住嚟食。
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載