› 選擇地區
三藩市
紐約
洛杉磯
其他美國地區
香港 台灣 北美
 
2008年06月26日

蘋果批:不負責家長好似禽流感?

蘋果批Online
今天《蘋果批Online》六時開騷:鄭家富講通脹Click入http://pie.appledaily.com收看
歡迎透過web-cam即時發表意見或致電29908648安排親身上場
電郵:mailto:pie@appledaily.com網誌:http://pieatapple.wordpress.com

管教子女,係父母嘅責任,因為只有父母先最了解、最愛護子女。但部份傳媒「知識分子」,卻捉住一啲極端嘅個別例子,指𠵱家嘅父母越來越唔識教細路,仲指情況好似疫症咁,要政府立法強制家長點去教仔……主持:楊卓華高明輝

1〉不負責任病毒?

天水圍小姊弟爬樓事件之後,社會廣泛討論,其中唔少借題發揮,將事件講到係一個社會普遍問題,包括商台烽煙節目《在晴朗的一天出發》主持黃永。

「𠵱家我哋睇到,不負責任嘅家長,就好似啲禽流感咁樣,不斷咁變種……既然(政府)對禽流感都咁小心,冇理由照顧小朋友冇照顧啲雞咁緊張㗎;係咪應該防患於未然,去睇番究竟有幾多不負責任家長?」
──商台節目主持 黃永

2〉香港嘅「不負責家長」好似禽流感咁蔓延?

社會福利署署長余志穩
我唔覺得好似疫情或者禽流感咁嚴重。社會對兒童嘅關注多咗,以前閂埋門打仔冇乜人知,但𠵱家如果有咁嘅事發生,老師、社工等都會好關注,我哋即刻就會知道,係個認知同關注多咗,所以(個案)好似多咗咁樣。

3

但好多「知識分子」藉今次事件要政府全面「監控」家長,搵出全港有幾多不負責任家長,又要政府立多啲法強制「教育」家長。

余:
素來都有討論應唔應立例,禁止家長獨留子女在家。但今次事件就同獨留在家無關。如果屋企有細路哥,係咪一定要強制裝鐵閘同窗花?我覺得係過份咗,因為一般細路哥,最好嘅做法就係教佢乜嘢係危險,乜嘢唔應該做,唔係樣樣都要落鎖;一個自由嘅地方,唔應該吓吓立例限到咁死……如果(強制)你鎖死或者焊死咗個窗花,火警嗰時亦可能出現問題。

你認為喺管教兒女方面,政府應該扮演乜嘢角色?

余:管教兒女,係父母嘅責任,亦係父母嘅權利。一般情況嚟講,社會,包括政府,應該尊重父母嘅決定,由佢哋嚟決定點樣管教或教育細路哥;但係如果佢哋疏忽照顧,令到細路哥受到傷害,社署就有責任介入……(但無論)根據人權公約又好,根據一般倫理又好,始終係由父母照顧細路哥係最好。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載