› 選擇地區
三藩市
紐約
洛杉磯
其他美國地區
香港 台灣 北美
 
2008年06月06日

隔牆有耳:新官上任So大支 - 李八方

設計圖片

中國官場好多傳統,習非成是嘅做法一代傳一代是其一,另一樣係新官上任三把火。十幾個副局長、政治助理噚日齊集山頂政務司司長官邸,同傳媒閒話家常修補形象兼同記者拉吓關係。國籍風波火頭燒盡,卻隨時擦出另一火花,八方聽聞返新工未夠一星期嘅蘇錦樑,有傳同AO不咬弦,新官擺款好大支嘢咁話。

越權搵AO代寫講詞

民建聯前副主席、商務及經濟發展局副局長蘇錦樑八面玲瓏,甫埋位就四出應酬,出席社團活動,少不免要善頌善禱一番,佢貴人事忙,寫講詞呢啲粗重工作,難免要搵官員代勞。八方聽聞其他部門AO得悉後好大反應,因為煲呔講到明副局長唔係AO老頂,如果局長冇指示,副局長不能越權點AO做嘢,此例一開,成何體統?
除咗要搵「替槍」寫稿,有啲副局長又要「借」用其他官員嘅秘書同座駕,令部份AO要幾個人共用一個秘書,或者幾個人輪流用一架車。食物及衞生局為免副局長梁卓偉同AO因此傷和氣,喺醫管局抽調架車去政府總部供副局長專用。
須知高官先有私人秘書同座駕,忽然要同人share,唔㷫就假,有人甚至指咁搞法做壞規矩,好離譜。有AO同八方講,最衰都係煲呔諗縮數,為使立法會通過副局長制,口輕輕向議員承諾唔會大增各政策局資源豢養「政治插班生」,搞到𠵱家AO人又冇、車又冇,無奈面對一班特首新「蠢」,大家惟有忍氣吞聲,遲早同煲呔算賬。煲呔都係AO出身,要𠱁掂扭計AO好容易,派多個秘書、畀多架車各個政策局就得,人人有秘書,個個有車坐,自然皆大歡喜,橫掂都係慷納稅人之慨啫,唔差在做多鋪!

徘徊鱷魚潭與虎穴

AO睇唔過眼官場新貴萬千寵愛,知情人士同八方講,其實一班新仔都好驚俾人跣。想當年老董孤家寡人入政府,縛手縛腳正係可鑑前車,副局長既要面對立法會呢個鱷魚潭,身處政府總部呢個虎穴難道唔知道要步步為營?有冇秘書、坐邊架車,新仔邊有得話事吖!
新貴、老鬼明爭暗鬥,八方相信好戲陸續有來。一班副局長、政治助理噚日見記者時誠惶誠恐,蘇錦樑表現得最客氣;潘潔話因為太多人搵佢,佢無暇逐個覆,唔係扮大牌;張燊悅老公楊哲安抱負係不再出現娛樂版;人工幾級跳嘅陳智遠好感慨咁話:「今次真係學到好多嘢。」唔知呢啲係咪叫「食住嚟拎」?

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載