› 選擇地區
三藩市
紐約
洛杉磯
其他美國地區
香港 台灣 北美
 
2008年02月11日

隔牆有耳:公務員特工隊四圍幫人 - 李八方

任職政府資訊科技總監辦公室嘅李玉儀(右)會同家人一齊參加義工活動。

潮流興crossover,原來公務員隊伍都有個叫Crossover嘅義工服務協作計劃,發起人路政署工程師黃恩諾話,佢哋舊年服務時數達12,000個小時,由唔同部門嘅同事各展所長。好似有一次,班消防員義工帶幾十個痙攣小朋友參觀青馬大橋,有小朋友開心到瀨濕咗條褲仔,照顧佢嘅消防員哥哥即刻帶佢去附近嘅公廁冲凉,印象難忘。

各部門合作設計服務

任職政府資訊科技總監辦公室嘅程式編製主任李玉儀成日去探訪老人家,佢話有次同一位阿伯傾傾吓偈,阿伯突然話想跳樓,佢大吃一驚,於是慢慢開解對方,傾完之後令阿伯取消呢個厭世嘅念頭,之後諗番都好有滿足感。另一位參加計劃嘅入境處總入境事務助理員黃振陞就話,佢有時會帶埋仔女去做義工,既可幫人又可教育下一代。
政府02年開始推行公務員義工計劃,鼓勵公務員成立義工隊用公餘時間幫助有需要嘅人。路政署義工服務隊05年發起呢個義工服務協作計劃,等各部門義工隊合作設計同參與社會服務,𠵱家已經有16個部門參加。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載