蘋果日報 | APPLE DAILY
› 選擇地區
三藩市
紐約
洛杉磯
其他美國地區
2008年01月01日

隔牆有耳:餐飲業大王08金鑊洗手 - 李八方

設計圖片

每年大除夕都舉行嘅怡和子夜鳴炮,今年請到香港餐飲業大王伍沾德嘅夫人李玉珍主持儀式。今年嘅炮聲一響除咗代表送舊迎新,亦象徵美心邁向新時代,因為美心集團嘅創辦人兼主席伍沾德今日起正式榮休,退落嚟擔任集團嘅榮譽主席,數十億元飲食王國正式交棒。
現年85歲嘅伍沾德近年淡出日常事務,但對生意好上心。飲食界立法會議員張宇人同八方講,伍沾德會定期約行家飲咖啡,問吓意見,順便收風了解最新行情。

請Beatles表演省招牌

伍沾德咁緊張,係因為呢個飲食王國係佢畢生心血,佢同已故大哥伍舜德喺1956年創辦首間美心,初時係高級西餐廳,伍沾德為省招牌,度出好橋請披頭四(TheBeatles)去美心表演,搞到萬人空巷,係佢打江山代表作。
美心由伍家創辦,但早喺72年已將五成股權賣畀英資怡和,怡和出舖,美心賣餐,所以中環人去邊食飯,其實都係食美心。
當年伍沾德有唔少新諗頭,好似用米奇老鼠圖案餐碟嚟做兒童餐,吸引中上家庭帶細路幫襯,當年仲係少爺仔嘅唐英年、馮國經同錢果豐都食到舔舔脷。美心70年代做埋中菜,開翠園等酒家;當時麥當勞殺入香港,兩兄弟認為有得做,決定進軍中式快餐,仲率先將先買飛後攞食物呢種制度引入香港,後來喺地鐵站開餅店,奠定包餅業龍頭地位。

掃除陋習管理細心

傳統中菜館唔多注重衞生,人稱大伍生嘅伍舜德要掃除陋習,規定員工唔可以有頭皮同口臭,洗手間更要亁亁淨淨,仲首創喺廁格門後加個鈎,方便女士掛手袋,好細心。餐飲聯業協會創會會長伍德良話畀八方聽,伍氏昆仲對香港餐飲業中一個最大貢獻,係開辦培訓中心提高從業員水平,「佢哋引入西方管理模式,中菜西食,令中菜變得高檔。」
美心集團旗下食肆300幾間,日日有幾十萬人幫襯,可以話總有一間喺左近,連搭飛機都食到佢哋嘅飛機餐,近年家族第三代傳人伍偉國主將美式咖啡店星巴克(Starbucks)移植香港,結果一擊即中,被視為美心王國接班人。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載