› 選擇地區
三藩市
紐約
洛杉磯
其他美國地區
香港 台灣 北美
 
2007年11月27日

隔牆有耳:民主黨上樑不濟下樑cry! - 李八方

泛民區選輸到一仆一碌,民協馮檢基即時辭職,民主黨何俊仁都話要落台,但被人力挽有得留低。近日泛民忙於幫陳太助選,暫時放下區選挫敗挑起嘅新仇舊恨,暴風雨前夕通常風平浪靜,八方收到風,一待補選結束,大家便會「擸架生」做嘢。
民主黨下個月15號舉行全黨檢討會,八方聽聞好多基層黨員對領導層好有意見,尤其係一啲落選者怨氣最大。四年前贏過劉江華、今年連任失敗嘅沙田區議員何淑萍,直指黨內選舉委員會主席李永達要為今次失利負主要責任,就算佢已經辭職,都要問責畀個交代。

政策大路街坊冇feel

何淑萍話以前民主黨「砌」民生問題由下而上,街坊覺得幫到佢哋自然記住白鴿招牌,𠵱家只係由上而下做大路嘢,街坊冇晒feel,「要求加生果金、小班教學冇錯,但個個政黨都爭取,點解要投票畀民主黨?」
八方call另一黨員,佢顯得意興闌珊,話民主黨今次選舉動員力低,同年前「真兄弟」事件內訌有關,黨員向心力大減,冇心機助選。佢又指個別黨高層私心重,力撐自己嫡系參選,卻諸多阻撓其他新人,「揸住雞毛當令箭,抵佢落台。」
民主黨現屆領導層去年上場,八方知道有人等唔切出年底改選,近日竟然有黨員查詢今年係咪要改選。有黨員同八方講,由於出年立法會選舉,相信大部份人都唔想個黨大地震,「起義」機會唔大,但人心思變,黨內大佬要反省吓嘞。
泛民其他政團正檢視「傷勢」,社民連下月中搞兩日檢討營,初步總結認為下屆應行精兵制,今次候選人質素參差係致命傷;地區工作向來係公民黨弱項,叠埋心水應付出年選舉好過;民協03年7.1後改打政治牌,今鋪證明企錯邊,勢將回歸地區工作路線。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載