› 選擇地區
三藩市
紐約
洛杉磯
其他美國地區
香港 台灣 北美
 
2007年10月23日

隔牆有耳:中共第十七圈政治牌局精讀 - 李八方

北京開完中共十七大會議,噚日馬上召開一中全會,九位將喺未來五年主掌大陸政壇嘅人物終於塵埃落定,各大傳媒今日都要用唔少篇幅報道一番,喺香港,各方面包括政府同唔少政界人物都選擇避開呢個風頭,因為傳媒版面實在所餘無幾,不過參選港島立法會補選嘅陳太,噚日正式報名同阿爺搶曝光,實在有啲兵行險着。
講番今次中央大洗牌,九名中央政治局常委,除咗胡錦濤、吳邦國、溫家寶、賈慶林同李長春繼續留低之外,仲有四名新貴加入,包括習近平、李克強、賀國強同周永康。未來五年,全國連埋香港,食餸食飯都要睇佢哋呢個政治核心嘅頭。至於本來主管港澳事務嘅曾慶紅就出局冇得玩。
𠵱家傳出準備接手做港澳事務話事人共有三個人選,就係賈慶林、劉延東同習近平。雖然最後邊位食出仲係好難講,不過本港政界之中,對三位中共高層都各有所好,若以雀局論政,今鋪真係人人爭食出,實行一鋪牌大殺三方。

煲呔最落力做大牌

當中搶牌搶得最落力嘅梗係特首煲呔啦,佢等緊嘅靚牌就係全國政協主席賈慶林。
話說煲呔05年無端端做咗特首,06年阿爺派賈慶林嚟香港視察兼幫佢打氣。煲呔當然出盡力招呼,尤其係當時好多人想知賈慶林過去做福建省委書記時,有冇同出走加拿大嘅遠華案主犯賴昌星有任何關連,煲呔就全程掩護賈慶林避開記者追問。結果賈慶林向煲呔回個小禮,就係訓示親北京人士,要全力支持特首依法施政。
同樣做緊牌嘅仲有田少,佢手上嗰副雖然唔係咩大牌,但就有新加入做政治局委員嘅統戰部長劉延東喺手,唔好睇劉延東唔夠起眼,佢同胡錦濤同屬共青團背景,深得胡主席信賴。田少𠵱家可能邊做牌邊想當年,佢以辭任行會成員嚟反對23條立法一役,事前咪就係專程到北京同呢位統戰一姐研究研究過囉。

唐唐隨時海底撈月

至於經常俾人截糊,兼夾好耐冇叫過糊嘅唐唐,應該會望住副牌喺度諗,「習近平係政治新星喎,呢鋪係咪可以食得出先?」自從江澤民退位,曾經受上海、江浙派系睇好有機會問鼎特首嘅唐唐,到胡主席上場後行情歸於平淡。近期唐唐人氣回升,加埋習近平又主理上海,睇嚟唐唐仲有機會海底撈月。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載