› 選擇地區
三藩市
紐約
洛杉磯
其他美國地區
香港 台灣 北美
 
2007年09月18日

隔牆有耳:肥彭又又又有喜 - 李八方

設計圖片

彭家有喜,恭喜恭喜!講緊嘅係末代港督彭定康嘅一家。同肥彭相識多年、份屬老友嘅嬋珍珠寶金行主席劉宏漢Benny向八方透露,肥彭么女彭雅思Alice有咗BB,預產期係下個月。講起雅思,唔少香港人印象猶新,因為佢十幾歲嚟香港,索爆嘅外形成為港英時代港男嘅集體回憶;近日「在晴朗的一天小便」上晒雜誌封面嘅林海峰,當年就為彭雅思作咗首歌叫《彭小姐》。

電影橫掃「印度奧斯卡」

肥彭今次已經係第四次做外公,因為大女潔思Kate同二女麗思Laura早為人母,先後誕下兩女一男共三粒孫。今年27歲嘅雅思喺劍橋畢業之後,做咗演員,仲進軍埋印度寶李活(Bollywood),拍咗套喺當地相當賣座嘅電影《青春無敵》(RangDeBasanti),又喺倫敦嘅WestEnd演出莎劇。兩個月前,《青春無敵》先橫掃有「印度奧斯卡」之稱嘅印度電影學院獎共10項大獎,真係雙喜臨門。
Benny話,90年代初結識肥彭,兩家人好好朋友,「大家睇住對方啲女大。」肥彭太太林穎彤更加係Benny細女嘅「契媽」,細女94年領洗時,肥彭兩公婆仲帶埋Alice到賀。最難忘嘅一幕,就要數97回歸,肥彭一家離開香港,肥彭幾個女梨花帶雨,Benny舉家當時亦熱淚盈眶,「嗰時我都有去送行,心情好激動。」

肥彭親撰賀詞𠱁老友

眨吓眼就過咗10年,Benny大女今年考入牛津大學,即係肥彭做校監嗰間,可見世界真係細。肥彭久唔久就重臨香港賣書,Benny話兩人最近一次聚首係今年6月。肥彭份人好念舊,知道Benny間金行開新店,上個星期日(9月9日)仲代表全家人親筆寫咗份賀詞祝佢生意興隆,𠱁得佢好開心。
雅思近年雖然冇乜返嚟香港,但佢早排接受傳媒訪問時笑言,已經唔記得晒啲廣東話,但仲記得幾句鬧人嘅說話。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載