蘋果日報 | APPLE DAILY
› 選擇地區
三藩市
紐約
洛杉磯
其他美國地區
2007年08月28日
馬上成為壹會員

隔牆有耳:月蝕開賭藏玄機 - 李八方

設計圖片

澳門威尼斯人度假村今日開幕,濠江賭業正式邁向拉斯維加斯化嘅新格局,對澳門嘅發展前景帶嚟乜嘢衝擊,留番畀專家學者研究。八方今日想同大家探討嘅係:威尼斯人點解要揀今晚撞正月全蝕之時兼農曆七月嚟開張?呢個翻版威尼斯水鄉嘅風水佈陣又究竟點同葡京、永利等鬥過?
根據天文台嘅資料,今日晏晝接近4點開始月蝕,到9點幾先完,威尼斯人就喺晚上7點18分正式開張,撞正月全蝕嘅時間。八方問過幾位堪輿學家,佢哋都一致認為,月亮係太陰,代表女性,月蝕不利女性,威尼斯人嘅老闆蕭登.艾德森係男人,唔使驚,但會不利女賭客,男賭客就應該專揀女荷官嘅賭枱埋手,可能有斬獲。

揀盂蘭節後如虎添翼

麥玲玲話,今日係甲午日,屬開日,中吉,晚上7點戌時亦係中吉,雖然一般正門生意唔會揀盂蘭鬼節前後五日開張,但賭場係偏門,陰氣重反而仲好,如虎添翼。但麥師傅有一令人意外嘅發現,就係威尼斯人賭廳嘅吊燈,唔似得金沙、新葡京嗰啲咁,成個蜂巢、蜘蛛網咁嘅「焗客」造型,顯示威尼斯人似乎走和諧路線,真係配合晒中央同特區嘅旗號。
至於威尼斯人又運河又水鄉仲要彎彎哋嘅佈局,李丞責師傅指出,呢個係玉帶環腰格局,勁聚財,對賭場嚟講可謂財源滾滾而來。不過,李師傅話永利「巨鰐擺尾」嘅佈局都係屬水,同威尼斯人冇直接相冲;新舊葡京嘅雀籠雀蛋屬金,所謂金生水,威尼斯人可以借助佢嘅氣勢,但亦唔算好大衝突;但星際以火為主,可以話水火不容。

堪輿學家醒賭仔幾招

周漢明師傅就建議,諗住遲啲去威尼斯人執番幾劑嘅賭仔,可以揀日光日白嘅中午時分去,因為呢個時候賭場冇咁當旺。
麥師傅就話,今日去賭嘅可以着黃色或啡色衫,屬虎屬羊屬狗嘅最旺,屬鼠嘅就少賭為妙,仲要留意角子老虎機部份地方裝修成亭台樓閣咁,屬飛簷入屋格局,對賭仔唔係咁好,最好揀過第二度,東南方就最好,因為係財神位喎,真係信不信由你。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載