› 選擇地區
三藩市
紐約
洛杉磯
其他美國地區
香港 台灣 北美
 
2007年08月28日

消費blog:富貴竹要唞氣勤換水

姓名:Shopping精
性別:女
年齡:年年24歲
興趣:行街買嘢、吃喝玩樂、做高溫瑜伽

「哎吔!黃晒喇!」日前喺office突然傳出一陣慘叫聲,原來係譚小姐發現自己枱面盆富貴竹,好多支都發黃,有啲仲差唔多枯萎。我仲以為佢照鏡發現塊面黃晒㖭!佢話諗住擺盆富貴竹,旺吓自己,點知搞到咁:「會唔會唔好㗎?」
見佢咁愁,問吓玄學家麥玲玲囉,佢話植物枯黃就唔好再擺。擺放植物簡單分兩種目的,一種係擋煞,例如放盆仙人掌之類喺一個唔係咁好嘅方位,好似五黃、二黑;另一種係催旺,擺富貴竹之類喺財位等。如果擋煞嘅植物變枯黃,表示幫你擋咗啲衰嘢,但如果催旺嘅植物變黃,證明個位唔係咁好,或者有啲「古怪嘢」,「但最重要係,有冇淋水先?」
「我就真係成日唔記得淋水嘅。」譚小姐自首。坊間嘅富貴竹有平有貴,為咗唔好嘥錢,公司資深嘅花王李伯就提醒大家,話富貴竹需要放喺空氣流通處,同埋一、兩日換一次水,但唔一定要太陽直曬,有燈光已經足夠嘞。
逢周一至周四刊出

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載