蘋果日報 | APPLE DAILY
› 選擇地區
三藩市
紐約
洛杉磯
其他美國地區
2007年08月17日
馬上成為壹會員

隔牆有耳:吊雞車逼近皇后 - 李八方

「皇后衞士」見吊雞車(箭嘴示)出現,以為皇后碼頭大限到,點知目標係大會堂嘅臨時冷氣機啫。
馬泉崇攝

成語「驚弓之鳥」大家都知點解,噚日發生咗個廿一世紀版本。話說爭取保留皇后碼頭嘅司法覆核塵埃落定後,政府不日之內就會將碼頭拆骨,切開上蓋、柱躉,再運去大嶼山存放,等待重置,「本土行動」成員雖然被迫撤離皇后,但仍然金睛火眼昅到實,噚日有人緊急向八方報料,指一架大型工程車殺到碼頭,隨時有所行動,皇后大限已到!
八方火速到場一睇,果然發現有架吊雞車停喺大會堂旁邊個巴士站候命,不過就唔見有大舉開工迹象。皇后危急存亡,本土行動成員應該盡最後機會,游說班工人手下留情,仗義每多屠狗輩,話唔定清拆工人加入保衞皇后。點知工人同八方講,佢哋唔係去皇后開工,只係做大會堂工程;八方向大會堂方面查詢,副經理陳淑霞話由於維修中央冷氣工程完成,所以call架吊雞車嚟運走部臨時冷氣機,「拆碼頭係土木工程拓展署嘅事,同大會堂冇關㗎。」聽到陳經理咁講,八方當堂鬆一口氣,原來大家杯弓蛇影,不過政府郁手係遲早嘅事,只係時辰未到啫。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載