蘋果日報 | APPLE DAILY
› 選擇地區
三藩市
紐約
洛杉磯
其他美國地區
2007年06月21日
馬上成為壹會員

隔牆有耳:不到維園非好漢 - 李八方

左起:華叔、張超雄同范國威齊齊着上「不到維園非好漢」T恤,為企出嚟遊行嘅市民打打氣。凌樹輝攝

長城被譽為世界奇景,毛澤東更指「不到長城非好漢」,馬丁接受港台訪問時話,好認同毛主席呢句話,佢喺80年代做《基本法》草委時,成日要去北京開會,開完會閒來無事四處遊覽行勻北京,大大話話去過五次長城。雖然做足五次好漢,但佢話仲有遺憾,因為89年六四事件後佢絕足大陸,佢話自己五登長城,最可惜係個仔Joey仲未去過,佢講笑話嚴格嚟講,阿仔仲未係好漢,不過𠵱家咁嘅政治形勢,都唔知何年何月,兩仔爺先可以一齊上長城做好漢。

華叔親筆題字

不到長城係咪非好漢呢?華叔話非也,喺香港回歸10年嘅時候呢句話要改寫㖭,佢今年出手號召市民上街,寫低「不到維園非好漢」七個大字,印喺為今年7.1遊行嘅白色Tee度,相信係呢期最潮嘅sloganTee。每年六四燭光集會、7.1遊行都喺維園舉行,所以件Tee上面仲印住「六四」同「七一」四個小字。
每次香港有大事,市民就會「由維園出發」,六四係咁,7.1都一樣,如果唔係有呢班有心有力嘅好漢行出嚟頂住,香港仲會有咁自由咩?23條都鋸到大家一頸血啦,就係因為咁,華叔話7.1一定要去維園,佢同八方講,千祈唔好以為呢句說話性別歧視,事關只要?住個「漢」字,咪即係「不到維園非女子」囉,總之男男女女都要上街,佢講到興起,話個「維」字都有含意,象徵維護人權。

每件Tee賣40蚊

度出呢條橋嘅張超雄話,毛澤東認為「不到長城非好漢」,但要因地制宜,喺香港就係「不到維園非好漢」嘞,因為維園象徵港人爭取民主據點,要企出嚟嘅時候就不能退讓;民主黨范國威進一步解畫,印埋「六四」、「七一」四個細字上去,呢件Tee就全天候通行,一年着兩次好實用。
張超雄話件Tee第一批印製200件,每件賣40蚊,一次過訂購3件只需100蚊,有興趣嘅市民可以去佢個網頁 http://www.cheungchiuhung.org/ 訂購。如果反應理想,佢話可能會加單應市,華叔就叫佢唔使等,應該即刻大批印製,事關今年六四環保袋賣咗成萬個,呢件有佢墨寶嘅T恤,肯定搶手。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載