› 選擇地區
三藩市
紐約
洛杉磯
其他美國地區
香港 台灣 北美
 
2007年05月29日

隔牆有耳:要人Pay者,人亦Play你!
(Rape人者……)
- 李八方

設計圖片

「剃人頭者,人亦剃其頭」,教統局局長阿瑟王同前下屬羅范出名口不擇言,後者名句係評論教師自殺人數,「如果係,點會剩係得兩個?」但點都唔及阿瑟王被指靠嚇嗰句經典,"I'llrememberthis,youwillpay!"阿瑟王日前作供時,懶幽默咁話要將呢句說話申請註冊專利,好似流行曲版權咁,第日其他人講一次,佢就抽一次水,真係想窮都難。

阿瑟王慘被rip-off

點知阿瑟王未嚟得切將呢個發達大計付諸行動,已經俾人rip-off抽佢水,有出版社搶飲頭啖湯,出咗一本名叫《騎呢教師之"YOUWILLPAY"》嘅諷刺小說,內容講前線教師喺呢幾年面對教改、殺校、縮班嘅壓力,其中一段情節,有幾個唔滿意教改嘅老師,投稿報紙唱反調,結果學校被秋後算賬,學校要縮班、裁員。
雖然呢本書寫明「故事純屬虛構,如有雷同,實屬遺憾,對號入座,無異自尋煩惱!」不過寫到咁白,又有兩個分別叫「李阿蝨」同「羅範焦」嘅高官經常出場,指兩人度橋強迫兩間學校合併,否則就cut人資源,搞到學校廁紙都冇錢買,本書想影射邊個,大家心照。

多名老師集體創作

本書作者叫「司馬行空」,一睇就知係玩嘢之作,據講係多個老師集體創作,由於現實生活中嘅經歷已經好荒謬,所以大家只係將平日課室內外所見所聞寫出嚟,唔使加鹽加醋已經夠戲劇性,睇落以為好誇張,其實唔少係真人真事喎。
出版社負責人陳先生同八方講,𠵱家啲教師忙到得閒死唔得閒病,仲肯花時間寫書,可見佢哋對教育高官真係充滿怨氣,用阿瑟王金句"YOUWILLPAY"做書名,都係想將平日谷埋谷埋嘅怒氣發洩一吓,所以冇諗過賺錢,一心玩嘢,只係印咗千零本,賣唔賣得晒,賺蝕都冇乜所謂。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載