蘋果日報 | APPLE DAILY
› 選擇地區
三藩市
紐約
洛杉磯
其他美國地區
2007年03月31日

特稿
清明前入貨租戶損失百萬元

在街市開花店及紙紮舖的黃女士稱,因臨近清明而入多了貨,今次火警令她損失慘重。

「領匯真係無人性,食人唔𦧲骨,一接管就加租又要我哋畀錢整新招牌,仲要閂埋消防灑水喉嚟裝修,今次真係一殼眼淚。」厚德邨街市歷時14小時的三級火,幾乎毀了所有舖檔,有檔主聲稱損失幾百萬元,揚言要領匯賠償。
經營海味雜貨的黃太說:「就嚟清明節,上星期入咗啲魚翅、鮑魚同冬菇,今次損失超過100萬。」她更表示,店內養了兩隻叫「小花」和「豆豆」的貓,估計牠們已遭濃煙焗死。「佢哋識得捉老鼠向我邀功,消防員幫我撬開鐵閘都搵唔到佢哋。」黃太想起愛貓當場哭了起來。至於黃太的丈夫,則整晚站在街市外,一臉憂愁。

相關新聞:厚德街市三級火示意圖

「十幾年心血冇晒」

在街市內經營紙紮舖及花店已13年的黃女士說:「呢段時間紙紮舖同花店生意最好,我幾日前入咗好多貨,今次冇咗50萬,一家人十幾年心血全部冇晒。」
曾經營多家燒臘店的陳先生說:「幾間舖生意都唔好,(領匯)仲要加租好難做,𠵱家得番一間舖都燒埋,訂咗80隻豬,唔知點算好。」同樣做燒臘生意的葉先生,舖頭燒掉了,供應商送來的幾萬元燒臘白白浪費掉。一名開五金店的林先生昨傍晚站在街市附近激動地說:「乜都燒晒啦,冇咗500萬。」
此外,厚德商場30家食肆商店亦被火波及,有酒樓負責人稱,魚缸裏的魚全部死掉,加上無法做生意,損失約40萬。火警期間,厚德街市旁的郵政局受濃煙影響整日關閉,街市樓上停車場因地面出現裂縫亦被封閉。
火警發生後,領匯派穿梭巴士接厚德邨居民往景林、寶林、翠林的街市買餸,但大部份居民均選擇到附近的超市。區內居民大多表示希望厚德邨街市能盡早重開。
本報記者

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載