› 選擇地區
三藩市
紐約
洛杉磯
其他美國地區
香港 台灣 北美
 
2007年03月09日

往事只能回味︰中環洪金寶成名之路

曾經露宿嘅中環洪金寶,靠黐靠攝,一度成為香港無人不識嘅奇人。
資料圖片

幾年前,香港曾經出現過一個奇人,成日同啲官商議員名人明星孖住見報,喺立法會門口見到佢、喺世紀爭產案法庭門口見到佢,就連黎瑞恩註冊結婚嫁入豪門嘅時候,都見到佢企喺婚紗背後。呢位超級攝石人就係「中環洪金寶」。

出小欖後身光頸靚

中環洪金寶原名曾治平,因貌似洪金寶而有此花名。佢04年喺維園偷手機斷正,仲同個官講「以為係神送畀我嘅禮物」,被判入小欖精神病院四個月,自此就好似人間蒸發咗咁。有人同八方報料,話幾個月前喺街見到中環洪金寶身光頸靚,但𠵱家撈咩就無從稽考。
大班鄭經翰噚日講番起呢位奇人,話佢雖然好煩,成日要人畀錢買佢本冇人睇得明嘅《警世箴言》,但唔係大奸大惡。原來大班曾經打去小欖問過,院方已經放咗佢出嚟,大班話中環洪金寶可能已經重新做人,大家要畀個機會佢。
中環洪金寶鍾意黐住政治人物同明星,成日着住恤衫西褲懶斯文,由寂寂無聞嘅露宿者,變身中環名人,全靠一流攝位技術,有官員企喺度講嘢,佢會攝喺後面博上鏡,更係大小論壇發噏風常客,連太空人楊利偉訪港,佢都唔執輸攝埋一份。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載