› 選擇地區
三藩市
紐約
洛杉磯
其他美國地區
香港 台灣 北美
 
2007年03月09日

街坊Hi你:上網的士好嘢!

的士黃:Hi,成議員,着晒成套西裝,又去開會啊?
成議員:唔係,趕住去個新春酒會,真係成個月都無停,連開個電子郵件嘅時間都無啊!
的士黃:唏,做議員就係食得鹹魚抵得渴啦,不過第日你會搭我車就唔使愁無得上網啦!
成議員:唔係啩,搭的士都有得上網,咁你都幾畀本去噃,但係無乜客會知你有咁先進嘅科技喎!
的士黃:唔係咩高科技啦成議員,呢個世界有競爭就有進步啦,政府唔好管咁多,畀我哋自由啲,就自然有人諗到新方法去突圍。就算係開的士,政府連收幾錢都管到死一死,咪一樣有行家組織打折車隊,咪就係有競爭嘅後果囉,最尾咪你哋啲消費者得益。
成議員:係,係,但係打折的士同上網無關係嘛?唔通你哋搞埋上網預約打折的士?係就記得畀個網址我,等我約你都方便啲啦!
的士黃:咁又未係住,不過都快㗎啦,你睇我哋行家𠵱家架的士裏邊成套IT裝備,手提電話都不知幾多部,仲要越方便越新款就越多行家用,乜嘢PDA手機,我哋用到熟一熟啦!呢啲咪叫的士司機自我增值囉,無人教㗎,更唔使講叫政府資助我哋,要搵食就自然識搵新方法,有行家諗到咁做,唔到你唔學,唔覺唔覺我都成個IT人咁。睇怕遲啲實連全球衞星定位都有埋,咁打折的士喺邊個位都一清二楚,你哋叫車就快到你唔信啦!
成議員:你一輪嘴講,都無答我第日搭的士點上網?

的士黃:係喎!係喎!我哋成日喺架車度,好難先同個客咁好傾,唔記得講畀你知㖭!實情係有啲上網公司有個流動寬頻計劃,喺我哋的士裏邊裝個細細部嘅盒,咁啲客就可以上網㗎喇!
成議員:咁厲害!咁我哋咪好方便咁插部機上網,呢排政府先講使幾億喺政府機構度裝無線上網,原來唔使公家錢就已經做到!
的士黃:等政府做科技嘢就死啦,仲要使唔知幾多無謂錢先做到少少嘢,不如佢唔好搞咁多,等我哋自己競爭,香港咁掂,實有計仔嘅!

《街坊Hi你》歡迎讀者及各界社會人士分享地區事務個案,本欄將盡力向有關政府部門跟進。
聯絡電郵︰forum@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載