› 選擇地區
三藩市
紐約
洛杉磯
其他美國地區
香港 台灣 北美
 
2007年02月26日

ipork點擊︰人間大愛 - 陶傑

在輿論正義聲討之下,小彤彤沉寃得雪,終於榮獲七十四萬元老虎機彩金,點知美資金沙賭場,懷恨在心,轉向彤媽發洩,竟然列彤媽為不受歡迎人物,仲囂張到話禁足澳門所有賭場!
小彤彤遭受欺侮,全靠彤媽發揮人類母愛嘅偉大精神,奔走爭回公道,一個母親,敢與財雄勢大嘅賭場對抗,敢向美帝SayNo,呢種情操,除咗愛國之外,直頭係冰心《寄小讀者》嘅現實血淚版,理應得到全港婦女組織、教育團體、盲光社、教統局一致推崇,感人肺腑!
但現在美資金沙,向彤媽展開報復,最令人髮指嘅,就係其他華資賭場,亦夥同金沙,一齊踐踏母愛光輝。須知彤媽,並無出老千,亦唔係恐怖分子,雖然一時不慎,將個未成年女帶入賭場,即使係咁,都係想個女贏錢之後交學費,培養成材心切,到賭場食人唔𦧲骨,更為愛女拋身爭回權益,比起香港好多將仔女擗低走去打麻雀,包括鎖喺鐵閘冷巷自己就走上大陸唱K作樂嘅無良父母,在呢個人性泯滅嘅省港澳,如同苦海明燈,大是大非,帶畀人好多溫暖!
呢個世界,點解會咁多好人受懲罰,受到強權欺侮?母愛有罪,護女有錯,澳門賭博集團,係咪想向天下父母仔女傳遞咁嘅訊息?世上只有媽媽好,小彤彤,你要力求上進,畀心機讀書,正所謂:「誰憐博彩金,報得三春暉」。十年之後,重返澳門利用你嘅好運,全線將澳門賭業煲起,為天下母親爭番啖氣呀!

蘋果日報fb,每日分享精選新聞及網絡新鮮事。
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載