› 選擇地區
三藩市
紐約
洛杉磯
其他美國地區
香港 台灣 北美
 
2007年02月26日

狗仔隊近期必追 - 李八方

小富婆彤彤上完報紙頭版就袋番74萬,簡直見證傳媒嘅威力。

人怕出名豬怕肥,無論係好事醜事慘事奇事大件事,只要揚咗出嚟多人睇,就有狗仔隊日伏夜伏追訪,近來最惹「狗」嘅,肯定係名留澳門博彩史、未成年先贏錢嘅16歲美少女彤彤,同埋今日開庭研訊死因嘅徐步高案,唔少行家同八方講,近日為咗呢兩單嘢要港澳兩頭騰,頻撲到有氣冇碇唞。
小富婆彤彤腳頭好到冇得頂,上完《蘋果》頭版就袋番74萬彩金,仲提醒澳門博彩法穿咗窿要快啲補番,勁過人大釋法。港、澳傳媒近日為刮彤彤出嚟訪,幾乎反轉成個澳門咁滯,各路人馬各師各法,有人透過親戚朋友叔伯兄弟鄉親父老捐窿捐罅搵人,卒之俾佢哋搵到彤彤嘅舅父,又有人刮到佢老媽子,但女主角依然企硬唔輕易露面,請好多記者食閉門羮。

輪班制全天候出動

有報館以守株待兔策略,派大隊狗仔隊搭船過大海,24小時喺賭場、碼頭同埋博彩局等運到,求為彤彤收錢一刻留倩影。照咁睇彤彤唔單止洗晒賭場烏煙瘴氣嘅老餅形象,仲唔覺意帶挈船公司、飲食業搵多筆,事關狗仔隊都要食飯,直頭搞旺咗澳門個場,佢唔做賭場代言人都可以做馬交旅遊大使喎。
徐步高嗰瓣仲熱鬧,上年爆咗殺警事件之後,間間傳媒機構好似警方咁,成立專案小組跟進,某報館嘅「魔警beat」更有超過10個記者,採取輪班制全天候出動,除咗有人喺徐步高生前住嘅東涌裕東苑屋企樓下打躉,又有人返鄉下搵佢嘅親戚,仲有另一team人向警界收風,只求快人一步,爆料達到。
被大批狗仔隊追住嘅徐步高家人,已練成一套同狗仔隊周旋技巧,會時不時玩變身希望避開狗仔隊,近日徐伯母換咗新眼鏡兼染髮,徐太亦轉咗髮型,希望冇咁多人認得。據八方所知,徐老竇幾平易近人,同記者傾到兩句;徐伯母雖然唔肯開口但非常有禮貌,依舊行街買餸湊孫,至於徐太就好少現身咯。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載