› 選擇地區
三藩市
紐約
洛杉磯
其他美國地區
香港 台灣 北美
 
2007年02月26日

街坊Hi你:請菲傭要諗清楚

尤太:Hi,成議員,唔見一排好似肥咗少少,個肚腩又大咗喎!
成議員:係尤太你先咁留意我個肚腩,我邊有你咁fit成日去跳舞啊,過年日日大魚大肉,油膩嘢又多,唔覺唔覺咪食多咗,個肚腩即刻現形。
尤太:嘻嘻,我又係幾fit嘅,不過就唔係因為去跳舞,而係要照顧兩個細路,佢哋鬼咁好精力,日跳夜跳咪搞到我都fit埋囉!
成議員:咁都幾好吖,又可以培養親子關係,又可以減肥,𠵱家啲OL成日話瘦身,都唔知係咪唔使照顧細路呢?你咁辛苦,點解唔請個菲傭幫手啊?
尤太:成議員,你估我唔想咩,之前請過菲傭同印傭都出事,𠵱家唔敢再請啦,後嚟咪辭埋份工等老公養,自己辛苦啲睇住啲細路囉。
成議員:出事?你做乜咁唔好彩㗎,個菲傭偷嘢定係打你個仔啊?
尤太:唔係,如果係呢類成日見嘅新聞,我都冇咁覺唔好彩,之前請個印傭都做得好哋哋,請佢嗰時幫佢做晒身體檢查,有乜頭暈身㷫,就實叫佢睇醫生,點知佢嚟咗冇耐就驗到生癌,廿幾歲都真係幾陰功,但係我哋都即刻好陰功,普通家庭傭工保險唔包醫癌症㗎嘛,咁我哋成家咪要畀埋佢嘅醫藥費,又唔叫得佢返印尼醫,試過有人咁做俾個印傭告到七彩。
成議員:咁又係幾黑仔,不過都係使多筆錢啫,呢類不幸唔會成日發生啩!

尤太:乜唔會,印傭出事之後請咗個菲傭,諗住搵個有活力後生嘅就唔會出事,點知佢嚟咗就話放假要出去過夜,原本諗住人哋離鄉別井,實係好想多啲見同鄉,點知無耐竟然話我知大咗肚,真係大件事,原本請佢幫我睇細路,大住肚都唔好意思叫佢做啦!
成議員:尤太你都係命中注定要做煮飯婆㗎啦,不過𠵱家咪仲好,又fit又開心!

《街坊Hi你》歡迎讀者及各界社會人士分享地區事務個案,本欄將盡力向有關政府部門跟進。
聯絡電郵︰forum@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載