› 選擇地區
三藩市
紐約
洛杉磯
其他美國地區
香港 台灣 北美
 
2007年01月22日

殺手都會憐香惜玉 - 李八方

一哥(右五)場上表現老而彌堅,跳高攔截敵方嘅斬球。
陳達浩攝

有師奶殺手之稱嘅警隊新一哥鄧竟成坐正冇幾多日,已經凸顯佢嘅親民作風。噚日下晝2點半,一哥坐住架1號專車抵達旺角香港警察遊樂會,熱身半個鐘,就落場參加輔警聯隊對國泰航空公司足球隊嘅友誼賽。比賽規則比較特別,國泰除一至兩名球員係男性外,其餘隊友都係英雌,7件對7件,每20分鐘為一節,分三節比賽,每節中途有五分鐘休息。
一哥嗰隊着白衫白褲,佢仲着埋同朗拿度一樣嘅10號球衣,非常醒目,兩隊互有攻守,一哥響場上老而彌堅,負責傳波同衝上前射門,但球運麻麻,始終浪費唔少隊友餵波。到第二節尾聲,一哥又舉腳抽射俾龍門撲出,啱啱隊友響附近執死雞補番一腳,即刻射成1比0,戰果維持到完場。
球場上嘅一哥揮灑自如,球技同佢響飛虎隊一樣咁叻,有隊友見佢面對女流之輩唔敢強硬攔截,索性幽佢一默:「你幾憐香惜玉喎!」
呢次比賽其實係運動同家庭同樂日嘅環節之一,參加者包括多支紀律部隊,有田徑、拔河、籃球、足球、羽毛球等比賽,到臨嘅公務員同家屬有數百之多,如果唔啱玩嘅,又可以參加攤位遊戲,甚至到售賣警察紀念品嘅攤位買番啲紀念品。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載