› 選擇地區
三藩市
紐約
洛杉磯
其他美國地區
香港 台灣 北美
 
2007年01月22日

陳日君帶你遊領地 - 李八方

陳日君樞機(右三)噚日去佢嘅領地教堂主持彌撒,佢背後嘅十字架用木造,有成15公尺長。
張嘉雯梵蒂岡傳真

陳日君樞機呢幾日喺梵蒂岡馬不停蹄咁參加教廷高層會議,商討中梵關係、對華政策呢啲大議題,梗係好忙。不過,佢噚日特別抽時間去到佢嘅領地,即係距離梵蒂岡約半小時車程嘅贖世主之母堂(S.MariaMadredelRedentore)主持彌撒,搞到班教友好開心,拍晒手咁歡迎佢。
陳樞機仲首度親自向八方嘅同事,介紹教宗本篤十六世封畀佢嘅呢座領地教堂。佢話,呢一區係新區,仲有好多無家可歸嘅流浪者冇人照顧,因此開設一個堂區組織係唔簡單嘅事。八方翻查資料,發現呢間喺1987年祝聖嘅贖世主之母堂今年剛好慶祝20周年,共有三萬名教友;地區有唔少社會問題,好似濫藥呀咁,失業率高達三成五,又有唔少新移民。
陳日君主教喺香港向來都關心弱勢社群,連佢喺羅馬嘅領地都屬於較基層草根嘅社區,又有咁多人需要關懷照顧,八方認為係天主好巧妙嘅安排。仲有,呢座教堂嘅建築設計好特別,同一般嘅教堂唔同。陳主教話,教堂個尖尖嘅屋頂,好似一雙合十祈禱嘅手,代表希望,代表天主嘅救贖,經過嘅車都會望得到。

教堂建築物本身就好似一個大帳幕,因為聖經話天主好似建咗一個帳幕咁住喺人們之間。仲有,贖世主之母堂個十字架用木材造成,長15公尺。據陳主教解釋,原罪嚟自一棵樹,即係夏娃畀亞當食嗰個禁果嚟自嘅嗰棵樹;另一方面,十字架就係生命嘅樹,代表救贖,同原罪嗰棵樹相對。

教友起勢拍手迎樞機

有位意大利教友用帶啲意大利口音嘅英文對八方嘅同事講,呢間教堂用玻璃、木材同石頭建造,可謂冬冷夏熱。佢又話,陳日君第一次嚟嘅時候有好多記者跟住佢,所以知道佢好出名,而且係一個好強嘅主教,今次佢特登遠道而來主持彌撒,令佢哋一班教友覺得好開心。教堂嘅主任司鐸喺介紹陳日君樞機時,啲教友仲起勢拍掌歡迎,可見陳樞機去到意大利,一樣咁受教友愛戴。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載