蘋果日報 | APPLE DAILY
› 選擇地區
三藩市
紐約
洛杉磯
其他美國地區
2007年01月01日

我問你答:剝奪吸煙自由的「好人」

韋基舜
曾任《天天日報》社長、香港足球總會副會長、香港拳擊協會主席

Q:你點睇全面禁煙?
A:「禁煙係選擇自由嘅問題,人類自由嘅其中一種。人嘅自由唔止選舉同投票,仲包括選擇朋友、喺大學讀咩科。人應該有選擇嘅自由,如果你反對吸煙,你可以作出選擇,酒樓接煙客嘅話,你大可以杯葛佢,唔去囉!又話影響健康,又話影響生育,又話會陽痿……既然有咁多害處,反吸煙人士點解唔索性禁止售賣香煙,甚至禁止入口呢?」
Q:中外吸煙文化有何不同?外國可以禁煙,點解香港唔得?
A:「《聊齋》作者、生於明代末年(1640年)嘅蒲松齡,佢喺門口畀茶啲鄉里飲,畀淡巴菇(tobacco,煙)佢哋食,再講古仔畀佢哋聽……可見食煙喺中國係源遠流長嘅習慣。唔止中國,我當年喺美國讀大學嘅時候,學校入面百分九十九點九嘅學生都食煙,但中國人一般習慣『戥兩戥』,再攞支煙畀你,外國人就會成包遞畀你,佢唔鍾意你掂過支煙先畀佢。所以話外國禁煙,香港未必就可以照搬。」
Q:你點樣評論禁煙對煙民身體有益嘅講法?
A:「有時去酒吧睇波,好多平時唔吸煙嘅人都會擔住口雪茄,係一個姿勢,型吖嘛,點解要唔畀我過癮先?為我好喎,老竇教仔都唔可以太過份啦,何況係外人?孔夫子都話:『忠告而善導之,不可則止』。唔好成日做個樣厭惡人哋,世界上有好多嘢你唔鍾意人哋鍾意,好似食臭豆腐咁……我喺香港由細到大,發覺回歸後愈整愈多束縛,成個社會冇晒以前嗰種兼容同埋和諧,以前就算叫嚤囉差、紅毛鬼,大家都生活得好融洽。」

Q:你如何回應二手煙對公眾的影響?
A:「我自己唔吸煙,但係我打咗麻雀幾十年,通常都係三支煙對住我一個,我絕對唔覺得辛苦,我肯兼容。我成日話,我係吸二手煙長大嘅,我今年73歲,我1951年喺美國讀大學,嗰時啲學生連去圖書館都食煙,我無抗拒吖。最明顯嘅一個例子,係我一個朋友區志賢,佢踢波、做交通安全隊、本身係警察,朋友之中佢最健康,不煙不酒,又冇夜生活,人哋叫佢『小白兔』,點知十年前佢六十幾歲就突然患肺癌死咗。肺癌根本就唔關二手煙事。」
Q:你有甚麼話跟主張全面禁煙的人士說?
A:「我𠵱家唔係話一定要取消禁煙,問題係回歸後太多『做好心』嘅人,用自己嘅愛惡決定人哋嘅愛惡,咁我嘅個人自由咪變咗由你嚟支配?點解大家唔可以自己做選擇呢?嗰個嘢鍾意食煙,你咪由佢囉!吸煙,話到底係一種嗜好,唔係不道德,但係𠵱家就搞到好似不道德咁……年晚錢,飯後煙,必不可少。𠵱家啲人咁勤力做嘢,『歎番支煙』係佢哋最享受嘅時刻,點解你要剝奪佢呢?我一生人最痛恨一樣嘢,就係啲人話為人好,但係嗰個人接唔接受你為佢好得㗎?又話肺癌、又話陽痿,咁人哋鍾意得唔得吖?」
本報記者 蔡志郁

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載