› 選擇地區
三藩市
紐約
洛杉磯
其他美國地區
香港 台灣 北美
 
2006年11月26日

  鏡頭內外
  立會開放日市民怨聲連場 - 李八方

學生噚日參觀立法會,由范太(右)帶路,示範打鑼。馬泉崇攝

噚日真係啱啱遇着剛剛,立法會同中國外交部駐港特派員公署齊齊開放畀人參觀,不過同市民比較息息相關嘅立法會,八方就聽到參觀者有唔少怨氣。
立法會主席范徐麗泰噚日朝連同另外九名議員出席開幕禮,其中七個仲帶參觀者遊覽大約一個鐘,點知下晝班議員走晒,搞到參觀者譚姓夫婦話,入立法會睇嘢,冇議員帶住氣氛唔夠,唔係幾好。有位女士又話,成日俾工作人員趕,企都未企定就要走,走馬看花咁。
斥議員開會瞌眼瞓
另一位鍾先生話,𠵱家政府拆得嘅都拆,古迹買少見少,但係佢話立法會大樓係古迹古董嚟,相信唔會俾人拆啩。最好笑係一位姓張嘅老先生,佢話立法會大樓建築物確係幾莊嚴,不過響電視度成日見班議員喺度瞌眼瞓,嘥晒納稅人啲錢,叫佢哋真係要檢討吓。
至於外交部駐港特派員公署係繼今年7月8日後,歷來第二次向公眾開放,不過只係得130多名中學生獲邀參觀,由特派員呂新華同副特派員解曉巖、明俊富接見。
其間最騎呢都算係呂新華特別提及世衞組織候任總幹事陳馮富珍,希望班學生向陳馮好好學習……八方心諗如果學沙士期間嘅陳馮,就真係死得人多嘞。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載