› 選擇地區
三藩市
紐約
洛杉磯
其他美國地區
香港 台灣 北美
 
2006年11月26日

  倪匡解碼quota人生 - 李八方

倪匡(右)心廣體胖,面色紅潤似壽星公,原來係因為戒咗煙酒。曾顯華攝

著名本地作家倪匡噚日做咗維園阿伯,喺維園做個人騷,向在場近200名市民大演棟篤笑。倪匡𠵱家心廣體胖,面色白中帶紅,遠睇有啲似壽星公,事關佢冇飲酒同食煙好耐,佢話呢個係quota(配額)問題,即係話一個人去到某階段自然會用盡某方面配額,跟住就不得不停手。
佢話以前每日五包煙,好快飲晒兩支拔蘭地,點知突然一日覺得唔想食煙,咁就唔食。佢又無端端有一日飲咗一支酒,覺得頭暈想嘔,無晒酒量,於是就唔再做劉伶,就算寫作亦係咁樣收工,搞到倪匡迷冇得再同偶像神交。不過好在佢仲好鍾意睇書,雖然住響銅鑼灣,咁多嘢買,但都可以喺屋企係咁睇書,唔使落街。
倪匡話DNA決定一個人嘅性格,佢就係樂天知命、豁達嗰種DNA,一直都唔同人計較同唔執着損失,佢認為既然每個人都係赤條條咁嚟,故此得唔到嘅嘢就唔係損失啦。佢曾經有朋友死咗個仔,佢向朋友話:「本來你冇仔,𠵱家死咗有乜緊要啫?」聽聽吓,八方就諗起莊周蝴蝶夢同逍遙遊,達觀到不得了呀!佢叫啲市民問得就問嘞,因為分分鐘佢會埋單咁話。

當年靠食老鼠維生

想當年貧窮,倪匡話嗰時幾乎餓死咁滯,好在識得捉老鼠同四腳蛇嚟食,所以𠵱家乜嘢都會笑一餐,冇乜所謂,例如曾經望住自己叫嘅一碟鮮茄豬扒飯,就莫名其妙咁對住碟飯大笑一輪,搞到對面嗰位阿叔以為佢黐咗線。沙士期間佢聽到有個靚女話冇牛油嘅麵包點食,真係唔知覺得好嬲定好笑。
對於時下啲人成日話年輕一代啲中文水準越嚟越低,倪匡話其實講呢啲說話嘅人都係上咗年紀,佢哋要明白乜都喺度變緊,應該盡量去適應,又話每個人都應該有部電腦,因為電腦好處多過壞處,係一個好好嘅圖書館同資料庫。
台下有個家長向倪匡投訴個細路鍾意睇漫畫,佢竟回答話冇問題,因為好似啲古人讀書讀到廢寢忘餐一樣,所以個細路將來會好有前途,個家長今次可能真係畀佢激死嘞。
倪匡好慶幸呢一世可以寫作維生,否則都唔知點算。佢鼓勵啲年輕人要睇多啲書,因為好似啲人冇收入,之後又點去提款呢?佢話睇多啲書就會有靈感,有靈感就可以係咁寫,就好似以前某朋友話佢係咪外星人附體一樣,好似來自另一個星球咁……倪匡即係倪匡,說話始終係用科幻怪誕結束。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載