› 選擇地區
三藩市
紐約
洛杉磯
其他美國地區
香港 台灣 北美
 
2006年11月16日

何俊仁力保招牌 - 李八方

民主黨五人小組查黨內「無間道」個報告未出,已經搞到滿城風雨,呢頭改革派又去紀委投訴小組洩密,嗰頭主流派又搵人放風要殺一儆百,將所有改革派電郵全部公開,仲要手快快喺星期六郁手,有黨內老成持重者話,其實搞成咁,對個黨有乜好處?所以佢知好多有心人想緩和局面,搵黨內德高望重者出面,睇吓有冇彎轉,第一個自然係馬丁,但原來佢老人家要星期日晚先返香港,怕且要救都救唔切。
搵唔到馬丁,就惟有搵候任主席何俊仁出馬,據八方知道,有人向仁哥提議,若然改革派入面有人真係有問題,最多第日選黨內職位時唔預佢,唔使好似打爛仔交咁,你一拳我一腳,連個黨「招牌」都打爛埋,到07、08年,仲點選區議會、立法會?
唔知仁哥係咪都認同呢個觀點,佢噚日喺立法會講五人小組報告,話個重點唔係要人頭落地,而係要搞好個機制,人有問題,都係個制度唔好先會搞成咁,八方望就望仁哥可以大事化小,保住個黨嘅元氣,唔係唔使阿爺滲透,選輸區議會、立法會已經可以搞散民主黨!

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載