› 選擇地區
三藩市
紐約
洛杉磯
其他美國地區
香港 台灣 北美
 
2006年11月16日

煲呔兩梳蕉食窮白鴿黨 - 李八方

唔好以為淨係女人至計啲婆乸數,民主黨幾個大男人都好「精打細算」。事緣前日佢哋七位立法會議員羅漢請觀音,請咗煲呔同鬍鬚曾去鯉魚門食海鮮。點知埋單計數,九個人食咗成六千幾蚊嘢,大家梗係嘩嘩聲,七個人除番咪大嗱嗱成千蚊,使唔使呀?搞到成班男人四出查找不足,睇吓食乜食出一筆糊塗賬。

酒都冇帶支

結果,經過負責碌卡嘅肥仔明明查暗訪,發現煲呔同何俊仁夾埋嗰五個保鑣(講到呢度不得不提,煲呔帶嘅保鑣只得兩個,比起仁哥嘅三個仲少,怪唔得俾黨友笑佢威過煲呔)嗰張單,原來都入埋佢哋張單,怪唔得比平時貴啦。最慘係作客嘅煲呔真係兩手fingfing,酒都冇帶支,搞到即時又要加碼開四支白酒,增添議員荷包負擔。
肥仔明不諱言,佢見到張單牙痛咁聲;好在仁哥有見及此,就自動自覺話叫佢分番張單出嚟;保鑣張單,佢包,大家唔使煩,咁先令到肥仔明避過走數危機咋。
問番仁哥點解咁豪?佢話唔通叫人哋企喺度望住你食咩,間中請吓真係冇乜所謂;而且,咁難得有機會請到煲呔保鑣食飯喎,都好難得啦。唔知係咪有十姑娘照住,仁哥咁鬼闊佬呢?

爭食咕嚕肉

原來仁哥前日嗰餐飯度,仲斗膽同煲呔搶食。事關仁哥試咗一啖咕嚕肉,就話畀滿分,然後當然係咁食,結果要煲呔出口,叫仁哥留番啲咕嚕肉畀佢,仁哥先至自制吓。據聞煲呔食方利魚時,不斷大談釣魚同食魚經,講到天下無敵,可惜佢講錯晒啲魚價,好明顯食魚唔知魚價。
仁哥喺席間都有多謝煲呔幫佢緝兇,高度讚揚煲呔咁大膽,肯講句去到天涯海角都要捉到兇手為止。講到呢度,鄭家富忽然插口講咗個小笑話。話說鄭家富12歲嘅囡囡有日睇完煲呔喺電視講嘢,就問佢天涯海角喺邊度?即係煲呔要追到去邊個國家?搞到煲呔笑騎騎,難道呃到小妹妹真係咁開心嘅?

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載