› 選擇地區
三藩市
紐約
洛杉磯
其他美國地區
香港 台灣 北美
 
2006年09月16日

  唐唐赴星洲搵幫手 - 李八方

強政勵治政府強推銷售稅,結果全軍盡墨,連大眾認定實行新稅有着數嘅會計界都話反對,苦口良藥都倒落坑渠,唐唐呢一棍都算食得應。不過唔使驚,曹操都有知心友,銷售稅呢隻怪物點都會有人支持,例如世界銀行同國際貨幣基金會。
世銀同國基會都係巴閉組織,但佢哋一向只注重政府財政夠唔夠穩定,你話加稅佢實贊成。但政府有水人民窮困經濟破產佢哋就唔理。記得亞洲金融風暴時,佢哋一樣閂水喉,又迫債仔政府減開支,結果累死好多人。

傳銷售稅有利普選

點解無端端講世銀同國基會?因為呢個禮拜日,唐唐就會飛去新加坡,參加下個禮拜二在獅城舉行嘅世銀及國基會○六年年會,趁機同各國財長及中央銀行官員打個招呼,最好就係搵啲人例如知名信貸評級機構撐吓銷售稅。佢離港期間,財司個位會由大蛇葉葉澍堃署任。
講起銷售稅,雖然八方話佢全軍盡墨,但政府仍然唔心息。佢哋正準備策動第二波宣傳攻勢,大搞地區諮詢會。今個禮拜行會復會之後煲呔首次開腔挺唐係一個訊號,而睇啲報紙翌日嘅報道,亦好明顯係有人收到風,敏感嘅人都知道有嘢做緊。
八方聽過有一個講法,話銷售稅實施會有利普選。理由係若果人人要交稅,咁社會福利開支增加時,公眾就會諗吓自己個荷包,會比較謹慎。咁大家唔要求派糖,商界就冇咁驚,就冇咁反對一人一票。呢個咁奇怪嘅關係唔知大家點睇,但係八方問過接近唐唐嗰邊嘅人,佢哋就話莫名其妙,否認有「綑綁」想法。
其實銷售稅要夠票過立法會一啲唔易,為下一次金融風暴居安思危做好準備更加係搵嚟講。呢個議題,其實最關係煲呔選舉連任。若然做得唔好,唔止唐唐死,甚至會連累埋佢;唔挺唐被人話縮骨,挺唐又惹禍上身,煲呔究竟點飲呢碗苦口良藥就真係好好睇。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載