› 選擇地區
三藩市
紐約
洛杉磯
其他美國地區
香港 台灣 北美
 
2006年09月16日

前日被養子推撞跌倒 養母:我想過死

前日被養子推跌的養母鍾麗華,昨在家中講述經過時表示好心痛。
黃學潤攝

【本報訊】「17年來我含辛茹苦養大佢,當佢係親生仔咁湊;估唔到佢會郁手打我,真係令人好心痛,好傷心;當時我想過死,後來諗深一層,我要留番條命睇佢回頭,睇佢長大成人。」前日被養子推倒的52歲養母鍾麗華,原來她生長在警察世家,她本身亦曾當過差;四年前因糖尿病導致雙眼失明的她,昨在觀塘翠屏邨家中向記者傾吐收養過程時數度落淚稱:「佢本性好乖,只係誤交損友所致。」

出生警察世家曾當差

前日下午3時,17歲黎姓養子因瑣事向養母大發脾氣,繼而動手將養母推跌在沙發上,養母㩒救命鐘,事件最後驚動警方。「我雖然冇受傷,但個仔咁對待,我個心真係好寒。」
鍾麗華稱:「佢由細到大都知自己嘅身世,但我對佢比親生仔仲好,點解佢會咁對我。」
鍾麗華透露,她父親、兩名兄長均當警察,在家庭影響下她亦加入警隊,後因父親反對她轉當交通警而離開警隊做保安員,其間她與公司一名保安員結婚;但婚後幾年她一直未能生育,在機緣巧合下,一名剛產下兒子又無能力撫養的「小姐」,將其骨肉交到她懷抱;「第一眼見到個佢,我就覺得同佢有緣,抱佢返屋企第二個月我就有懷孕啦。」鍾麗華又說:「我尊重佢生母決定,一直無同佢改名改姓。」

「佢會返嚟我身邊」

家庭添了兩名成員,鍾麗華與丈夫轉行經營報紙檔以應付家庭開支,此時夫妻亦因性格不合而離婚,她亦轉行承包大廈的清潔工作。「我一個人湊兩個仔,你話幾辛苦呀!」鍾麗華說:「佢兩兄弟自細都好乖,小學年年都考前三名,但上中學後大仔誤交損友,結果成績一落千丈,今年會考就無再繼續讀書,而細仔今年中學畢業後亦出來工作。」
現時靠租金過活的鍾麗華表示,前日事發後,大仔已搬到朋友家暫住,她說:「生母不及養母大,我相信佢會返嚟我身邊嘅。」

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載