蘋果日報 | APPLE DAILY
› 選擇地區
三藩市
紐約
洛杉磯
其他美國地區
2006年09月08日

  仁龍傑哥齊入香港會 - 李八方

《1900年》香港會初期只收英國人做會員,華人免問。

位於中環心臟地帶嘅香港會(英文叫TheHongKongClub,千祈咪搞錯TheClubofHongKong)係尊貴會所,一直畀人高不可攀嘅感覺,會員只有1,300人,個個都係城中要人,非富則貴,好多人排隊想入會,但都係得個等字。
八方聽聞律政司司長黃仁龍同立法會議員梁家傑最近都入咗會,真係可喜可賀。因為要得到30幾位遴選委員一致贊成,一個blackball(反對)都冇至得。咁黃仁龍貴為司長,將來有機會做特首,雖然冇例外,一樣要面試,但肯定難唔到佢;而Alan傑哥又係立法會議員兼前任大律師公會主席,亦有機會去選特首,兩個都係真正才俊,要過呢30幾關當然唔會太難。

置地還業權 收租好肥仔

香港會將來好發,𠵱家入會抵到極。因為84年佢哋畀置地重建會所,條件係置地有25年收租權(大樓25層,除咗8層會所,17層寫字樓每層8,700方呎,可出租樓面大約15萬方呎),2009年置地就要歸還成棟大廈嘅業權畀佢哋,你話幾肥。以萬五蚊呎計,15層寫字樓值22.5億!咁當然佢哋唔可以賣咗啲樓分銀畀會員,但一個月收900萬租(60蚊呎),到時大把水,可以擴建,整番間中餐廳,整多啲健身室等等,總之會員福利就一定好好好啦。
呢個富貴會早喺1846年成立,大概同香港開埠時間差唔多,喺殖民地時代,只受英國人玩,係高級社交場所,何東都入唔到;後來先有個別華人獲邀加入。當然97後,會員中已有三、四成係中國人。以前佢哋連女會員都唔收,如果唔係平機會,佢都唔肯開放。

入會睇地位 月費千幾銀

收會員嚴,連衣着規矩都好嚴,女士一定要着裙,否則旋轉門都入唔到。話明係會所,大家嚟social吓,食個餐,飲杯afternoontea,所以規定唔准喺度傾生意。記者如果冇新聞,企喺會所門口好易有收穫,大把名人畀你影。
入會費唔貴,十幾萬,月費千幾銀,不過想入會,要有兩個超過五年會齡嘅會員推薦,財富唔係首要考慮,最緊要係社會地位、身家清白,高官、法官、專業人士、議員以及大家族都有着數。有啲人輪咗10年都冇消息。你估司長同大狀之後,下一個新會員係邊位?
至於主席,如無意外,馬會主席陳祖澤有機會成為第二個華人主席,第一個係李福善。上任主席係詹伯樂,現任係IainBruce。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載