› 選擇地區
三藩市
紐約
洛杉磯
其他美國地區
香港 台灣 北美
 
2006年07月10日

  民協3:0大炒民主黨 - 李八方

民協同民主黨打「政黨世界盃」,馮檢基(左三)同達仔(右)賽前揸揸手先,馬丁(左)都有嚟打氣。
梁幸兒攝

食住世界盃熱潮,民協噚日就約埋民主黨上演咗一場「政黨世界盃」。民協馮檢基好抵死咁同八方講,佢本來係想請最大反對派民建聯踢,點知對方唔制,惟有搵最大友好派嘅民主黨頂上。由於兩隊球員年紀都有番咁上下,所以半場踢30分鐘,兼且可以無限換人。
馮檢基雖然被隊友稱為「民協大哨」,不過唔知佢係咪成12年冇踢波,跑到好似行路咁,仲踢咗唔夠10分鐘就謝咗,要出場休息,相反民主黨達仔李永達雖然係肥仔一名,但係踢中場就搏命好多,不停為隊友製造機會。
八方見民主黨青委一大籮,以為佢哋好掂,點知個個都漏晒氣,達仔都忍唔住寸班隊友冇氣冇力,反而民協雖然老將多,但係個個禮拜都有練波,完半場前就已經入咗一粒,之後仲送多兩隻蛋畀佢哋。雖然係友誼第一、比賽第二,但係連輸三球,達仔可能發現隊友身體唔夠好,建議兩個禮拜練一次波,備戰10月嘅「民主普選盃」,聽聞到時仲有前綫、公民黨、社民連線同職工盟加入,肯定好過癮。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載