› 選擇地區
三藩市
紐約
洛杉磯
其他美國地區
香港 台灣 北美
 
2006年07月10日

  匯豐高招玩殘煲呔 - 李八方

上個禮拜好多公務員過咗第一個五天工作周,今個禮拜仲正,係四天工作周。點解?因為噚晚睇完波,今日就算返工,實情當放假可也。各位官長亦冇必要太過執着,四年一次,唔使吓吓都強政勵治嘅。千祈咪學九巴咁話會報警拉啲詐病請假嘅司機大佬,咁做好冇人情味啫。唔怪得陳祖澤做唔成特區領導。

「好日」宣布六天服務

講番五日工作,八方記得舊年鄺廣傑大主教喺佢篇聖誕文告中,呼籲大家要關注工時長問題,話現時僱傭關係仲差過奴隸制度時,大主教仲率先建議實行五天工作。之後冇耐,滙豐就傳出研究畀員工每周返五日。當時好多人諗唔明:香港地銀行服務咁重要,點可以縮短營業時間呢?滙豐莫非short咗?點知跟住就到煲呔出招,仲話咁快手在今個月開始畀部份公務員返少半日。
特區回歸之後,七年浩劫八年惶恐,公務員亦係嚴重受害一群。先有阿松哥空降入嚟,落佢哋面;繼而又有董伯整個問責制,奪佢哋權;最傷仲係要減人工削福利,兼夾俾人抹黑為貪婪嘅蛀米大蟲。所以呢十六七萬最優秀嘅人才士氣低落到極。咁煲呔改朝換代,點都要搞搞佢。除咗搵咗較得人心嘅D姐去領軍之外,有乜好過慷納稅人之慨,等班馬仔馬女一年放多24日假咁去收買人心?
點知千算萬算,都算唔到short咗嘅滙豐,會喺政府第一次禮拜六放假前兩日,竟然嚟一式五日工作六日甚至七日服務,贏盡全城輿論嘅高招。滙豐呢一擊,令到同行手忙腳亂,更加令到政府好醜樣。本來運輸署周六唔換牌、康文署唔訂場、食環署唔捉老鼠、房屋署唔接受公眾查詢等等強政勵治措施,已經受到市民批評,不過大家諗住打工仔有機會放多半日假,算喇。到滙豐叻到又放假又改善服務,相形之下,政府就變成一條吞泡嘅大懶蛇。

高官死撐運作暢順

八方記得上個禮拜五,啲社論啦、Phone-in啦都係鬧鬼政府,坐喺行會本身係銀行家嘅寶哥哥,被人問到呢件事就耍晒太極。聽聞好多高官亦念念有詞,到禮拜六,惟有死撐,話唔開工都「運作暢順」!真笑死人。咁鬼叫你特區政府在行會飛走滙豐代表咩。你話如果鄭海泉坐喺裏面,點都會關照聲,唔使政府咁被動,又或者遲少少先公布高招,等人哋冇咁尷尬啦。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載