› 選擇地區
三藩市
紐約
洛杉磯
其他美國地區
香港 台灣 北美
 
2006年07月10日

消費blog:將酸橙變甜秘方大公開

將橙浸喺溫水,會令酸橙變甜;橙汁又可拯救氧化咗嘅蘋果,科學真係勁有趣!

天時暑熱,除咗飲水,我會食多啲生果補充水份,前幾日買咗啲橙同蘋果,返公司同同事明明分享。點知一食,啲橙酸到死,嬲嬲地想即刻丟咗佢,但明明高聲叫停:「咪住!」(>_<)
佢用個大碗裝大半碗溫水,將其餘兩個橙連皮放喺水入面,10分鐘後,再切開啲橙食,嘩!真係甜咗啲喎。我仲將之前食剩嗰半個酸橙,放喺保鮮袋,然後照辦煮碗,浸溫水10分鐘,嗰半邊橙真係變甜!
喺我哋搞緊呢個小小實驗時,發現旁邊切開咗啲蘋果已經變咗鐵銹色;雖然咁講好衰女,但係真係睇見都無胃口。點知明明又有橋,佢將幾個橙榨汁,用橙汁嚟浸蘋果10分鐘,結果啲蘋果又變番白雪雪!(^O^)
明明好威風咁話:「呢啲係我祖傳秘方。」我問佢點解,佢停一停,然後話:「唔知喎。」激死!!!

理大應用生物及化學科技學系講師梁潤松後來同我講,理論上嚟講,橙有酵素,酵素喺溫度稍高環境會更活躍,可以分解橙入面嘅酸性分子,咁橙嘅果糖就會多過酸性分子,所以會甜啲。佢又話,蘋果有鐵質,切開咗遇空氣會氧化,但橙就有還原型維生素C,係天然抗養化物質,所以氧化咗嘅蘋果,浸橙汁後,會變回原狀。
梁博士好叻㗎,佢曾經發明治療肝癌嘅新藥物,但講到呢啲嘢又可以深入淺出;所以話,高深嘅科學,其實都可以好生活化。(^_^)
逄周一刊出

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載