› 選擇地區
三藩市
紐約
洛杉磯
其他美國地區
香港 台灣 北美
 
2006年04月28日

  夏佳理橫跨香港兩賭場 - 李八方

馬會主席夏佳理出名醒目,瓣數又多。大家都知佢係律師,在法律界好有地位。同時佢又代表地產界,同一眾大地產商有好深淵源。講到政界,雖然佢自己選擇退出立法會唔做議員,但政圈中人唔會當佢冇到。仲有馬圈,相信馬迷唔記得個主席都唔會唔記得佢隻「翠河」。噚日佢當選做交易所主席,又多一瓣,再喺證券界叱咤風雲。
點解話再呢?大家可能唔記得,夏佳理雖然唔係經紀,但佢曾經追隨馮景禧,喺經紀少林寺新鴻基證券做過高層。就算後來唔做新記去咗胡關李羅,佢都冇疏離股事。87年股災前李嘉誠長實系大集資100億,佢就有幫手。所以煲呔喺行會之中點將,搵人接替李業廣出掌交易所,真係捨夏其誰呢。
除咗熟悉股事兼夾人緣好之外,夏佳理仲有一樣嘢其他人冇。噚日交易所董事互選主席,得佢1個候選人,雖然佢前日至做董事,但亦冇人敢挑戰佢。一來有煲呔撐,二來冇人有佢嘅特長──乜嘢特長?就係管理大型賭場嘅經驗。

馬交賭業細路冇得搶風頭

係人都知,馬會名為慈善機構,實際上係做博彩,講得難聽啲就係開賭。交易所嘅性質同馬會好相似;買股票,十居八九都係炒,係投機(投機失敗咗甩唔到身咪變成投資)。呢一個現實,小股民個個都同意,早排證監會做咗個窩輪調查,大家都好坦白咁講話係賭啦,唔通買輪嚟投資咩。故此,夏佳理由馬會過檔聯交所,只係由一個高級賭場轉去另一個高級賭場,本質上並冇改變。
賭王位公子阿猷龍就唔好彩啦,佢想爭取小經紀支持做交易所董事,本來有啲機,但係,特區政府內定夏主席睇呢個場噃,有呢個香港賭業大哥喺度,又點輪到你個馬交賭業細路嚟搶風頭?結果咪連陸恭蕙都砌唔贏囉。

傳真︰2623-9278
電郵︰pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載