› 選擇地區
三藩市
紐約
洛杉磯
其他美國地區
香港 台灣 北美
 
2006年04月13日

文化打哈哈:香港維基人

網上有個免費百科全書嘅網站,個名叫「維基百科」(Wikipedia)。WikiWiki係夏威夷話,解做快。由二○○一年創站至今,已經有一百二十三種語言嘅版本,你查中文嘅就有繁體字版同簡體字版畀你揀(但大陸同胞上唔到呢個網)。
免費固然吸引,但係最有趣嘅係你可以參與編輯。人哋寫得唔啱嘅你可以改又或者補充。我試吓查西九,內容就已經update到推倒重來。得意嘅係篇文章話當初老董點解要搞西九係因為外國遊客投訴冇文化嘢畀佢哋睇。言下之意係遊客唔出聲又點會有西九,所以大家以後出外旅行記得向當地政府投訴話冇嘢睇,咁人哋咪會搞文娛藝術區囉。
睇吓西九份名單,周梁作為旅發局主席就睇住其中一個委員會就知政府嘅思維。當年港英政府點解要搞香港藝術節呀?係因為每年二三月冇乜遊客嚟香港玩,所以咪搞個節嚟吸引人囉。

由於查西九,所以睇多咗中文維基嘅嘢。首頁嘅新聞動態已經報道咗香港電影金像獎、兩鐵合併呢啲新聞,果然WikiWiki。
跟住見到「香港維基人」,click入去睇吓,睇吓睇吓,睇咗成個鐘。喺二○○五年,一班香港維基人首次聚會。與會者嘅平均年齡比其他維基百科一般用戶重要低──聚會中,有三個係中學生、其餘四個係大學生。佢哋走在一起,就係要改善有關香港嘅條目。「香港維基人」有好多興趣小組,天文、地理、藝術等。
我佩服呢班同學嘅努力,其實佢哋正在編寫香港歷史。將來要研究香港歷史嘅話,呢度就係一個好去處。例如乜嘢係慈雲山十三太保?曾灶財寫嘅字喺邊度搵得到等等。
呢班人做嘅嘢令我諗起歐美常講嘅culturaldemocracy,不但政治要民主,文化亦要民主。
觀火

傳真︰2623-9278
電郵︰pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載