› 選擇地區
三藩市
紐約
洛杉磯
其他美國地區
香港 台灣 北美
 
2006年04月13日

  笑口噬噬雙許會 - 李八方

許仕仁(右)噚日喺官邸設宴款待深圳市長許宗衡,佢兩個好啱傾,成餐飯笑唔停。政府新聞處圖片

由深圳市長許宗衡率領嘅四十人金融代表團噚日嚟香港展開為期兩日嘅訪問,佢哋到埗第一擊,就係同財爺唐唐會面。咁又係,港深兩地嘅金融業合作空間好大,深圳好想做香港嘅後勤基地,兩地如果可以互相提供新嘅市場空間,齊齊提升競爭力,又何樂而不為,要邊緣化都拉埋深圳一齊好啲。
見完唐唐,許市長就去咗白加道同佢嘅同宗許仕仁司長見面。有客自遠方來,肥龍梗係要好好款待,所以特別喺官邸設宴,請佢哋食餐晏仔。
唔知係咪許市長腳頭好,定係深圳啲廠家識做,停止生產廢氣半天,噚日維港兩岸竟然無晒啲烏煙瘴氣,喺維宮嘅花園望出去,成個維多利亞港、西九到條大橋都睇晒,藍天白雲,青山綠水,照咁睇,許市長多啲嚟就好喇。
肥龍成日笑口噬噬,而許市長亦好風趣,所以雙許好啱傾,許市長仲老大哥前、老大哥後,𠱁到肥龍好開心,難怪見佢食飯都食到見牙唔見眼。許市長今日見埋煲呔先至走,算係圓滿結束兩日訪問啦!

傳真︰2623-9278
電郵︰pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載