› 選擇地區
三藩市
紐約
洛杉磯
其他美國地區
香港 台灣 北美
 
2006年04月13日

  民主派百人大轎請陳太出山 - 李八方

呢個復活節,公民黨湯家驊同白鴿黨嘅李永達都冇時閒,皆因佢哋要四周出動,游說啲民主派嘅同路中人要出嚟參加負責選行政長官嘅選委會選舉,因為如果民主派喺八百人選委中攞唔到一百個位,咁就冇法提名一個人去同煲呔撼,好似達仔舊年咁樣衰,連第一道門檻都跨唔過,就認真冇癮。
八方記得,當年起草《基本法》,規定要有不少於一百名選委聯合提名先至可以做特首候選人,係因為怕太多人參選,花多眼亂,因為每一名選委只可以提名一個候選人,所以頂多都只有八個人可以落場,邊個會諗到班友仔會利用提名機制去封殺對手,實行做楚霸王。
老董連任時開咗個好差嘅先例,煲呔舊年照辦煮碗,搞到個特首選舉變成提名爭奪戰,完全失去選舉嘅真正意義,次次都只有一個候選人,唔似得第一屆特首選舉有吳光正、楊官同埋李福善一齊參賽咁好玩。
煲呔𠵱家坐定粒六,只要冇乜大錯,胡溫都費事換人,等佢做多五年再算,不過,中央意旨喺香港特區未必通行無阻,只要民主派搵到一百個提名人,就可以派個強人如陳四萬同煲呔撼過,到時投暗票,點知會唔會有人最後玩嘢,投晒畀陳太,煲呔分分鐘中空寶。

陳太能煲呔所不能

所以呢場選委會之戰唔只係前哨戰,簡直係埋身擊,達仔話,佢一定要全力以赴,否則手上冇票,從何去請陳太出山,呢頂百人大轎真係唔易做,但係唔係冇機會做,因為上次選八百人嘅時候,民主派愛理不理,今次就完全唔同。
八方聽聞,民主黨嘅中委會早前已經作出決定,就係黨員要聽黨指揮,唔可以畀啲社福界好似上次咁,提名前搵民調過橋,將啲票畀咗煲呔,激到達仔彈起。
達仔滿懷信心,話連中醫同漁農界都有人會出選,八方真係希望佢成功,至於搵邊個去選特首,似乎大家都屬意陳太,好似四萬一出,誰與爭鋒咁。的而且確陳太係目前唯一民望可以挑戰煲呔嘅人選,之不過,冇人知道佢阿姐呢個香港良心諗緊乜。
陳太愛港同關心香港都係發自內心嘅,佢對香港嘅感情肯定比自稱飲香港水同流香港血嘅煲呔深同真,有民主派人士最近喺賀陳日君榮升樞機嘅酒會上見到佢,陳太仍然好健談,而且對好多香港事都好有興趣,下個月佢仲答應咗亞洲出版人協會做周年頒獎晚宴主禮嘉賓,發表重要演說㖭,所以佢絕對有機會出嚟同煲呔撼。
煲呔能,陳太當然能;煲呔不能,陳太都能,八方唔係叫大家猜謎,煲呔唔敢同北京爭取加快香港民主步伐,陳太一定敢,分別就喺呢度。

傳真︰2623-9278
電郵︰pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載