蘋果日報 | APPLE DAILY
› 選擇地區
三藩市
紐約
洛杉磯
其他美國地區
2006年03月03日

  湯狀爭公民黨黨魁
  張健利做主席機會大 - 李八方

張健利

以法律專業知識打響名堂嘅45條關注組,今個月就會正式宣布百人組黨大計。雖然好多傳媒都追問四大狀組黨情況,但佢哋個個都好口密,搞到好多人都囉囉攣,好彩佢哋下星期一會搞吹風會,由毛孟靜講吓最新進展,例如黨徽同黨色係點,八方就唔驚冇米落鑊。
最新一期《A45》報道,關注組暫定名為「公民黨(CIVILPARTY)」,貪個名簡潔有力,切合佢哋追求社會公義同照顧弱者等嘅價值觀。雖然湯大狀話最終未必係呢個名,但八方聽聞唔會有乜改動,邊有黨名仲夠「公民黨」咁言簡意賅?

走中間路線唔爭客

關注組成員個個都係專業人士,又身光頸靚,好容易俾人以為佢哋高高在上。佢哋都特別澄清,「公民黨」絕對唔係高不可攀嘅「富貴黨」,更加唔會為反對而反對,或者做啲狂妄顛覆嘅嘢。即係既非自由黨同類,更非反對派;要走,就要走中間跨階層路線。
好多人都好關心,「公民黨」會唔會撬走晒民主派嘅人員?關注組就好肯定咁同大家講句「唔會」,堅持唔會向民主派友好「挖角」,仲特別提到,唔會接受雙重黨籍;諗住食兩家茶禮嘅人,唔使旨意有機會喇。
其實自從關注組宣布組黨後,好多政黨都視佢哋為假想敵,最怕佢哋搶走政壇阿一地位,所以不時都有不利消息傳出,例如被批評狂妄自大。湯大狀對此好睇得開,直認樹大招風,相信只要做好份內事,工作又獲市民確認,就唔怕被人打壓。
傑哥Alan都同佢英雄所見略同,覺得喺政圈入面,好難控制到人哋把口講乜,所以做好自己嘢就OK,唔使理其他人嘅攻擊,屬豁達人一個。
雖然關注組未定邊個做黨魁,但因為只限由地區直選議員先至可以做,所以不出余小姐Audrey、湯大狀同Alan之爭。孔融讓梨呢個古仔大家都聽過,八方覺得三人中年紀最細嘅Alan,一定會讓路,最終只會係由大哥風範嘅湯大狀同最淡定嘅民主女神Audrey之爭。
咁個主席又會係邊個?八方就建議由資深大律師張健利做,因為佢閱歷深厚又有江湖地位,又做過行政局成員,由佢做最合適。
大狀黨會如期本月下旬成立,由於仲搵緊場地,所以冇得公布時間住喎。

傳真︰2623-9278
電郵︰pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載