蘋果日報 | APPLE DAILY
› 選擇地區
三藩市
紐約
洛杉磯
其他美國地區
2006年02月06日

  中大校長的三隻狗 - 李八方

狗年伊始,原來中大校長劉遵義亦很愛狗,校長官邸漢園內更有三頭分別為中大不同年代校長的狗仔,他拖着的金毛尋回犬Muji則屬他自己的。
黃賢創攝

踏入狗年,狗仔真係威晒﹗中大校長劉遵義噚日首次邀請傳媒去佢嘅官邸漢園新春團拜,校長親自煎最拿手的牛扒宴客外,三隻不同年代中大校長嘅心肝寶貝狗仔都出晒嚟招呼客人,佢哋分別係光纖之父高錕嘅十八歲蝴蝶犬溝唐狗「狗瑞」Lulu、李國章嘅愛犬唐狗Dora,同埋劉遵義未足一歲嘅金毛尋回犬Muji。

三隻愛犬三種性格

講開呢班「校長狗」,劉校長顯得好開心,佢話Lulu就係人哋送畀高錕;黑色嘅Dora原本係流浪狗,唔知點解突然入咗去校長嘅官邸度住,又得到李國章嘅愛護。負責校長官邸保安嘅人員重話,以前成日見到李國章同Dora嘴對嘴親熱,好鬼friend。劉校長話,佢隻Muji個名代表「無印良品」,係佢哋個仔同隻狗改嘅名。𠵱家Muji只有十個月大,好活躍,但係識得畀「手手」,又鍾意同人玩,唔怪得校長見到佢咁開心啦!
不過,八方有啲唔明,啲校長話咁錫啲狗,點解離開官邸時個個都將愛犬留低?
劉校長又話,當年李國章做校長時,校董會知道佢鍾意打網球,專登為佢整咗一個網球場,𠵱家仍然喺校長官邸,升咗做局長嘅李國章就當然唔可以用啦﹗劉校長都話佢都鍾意打網球,遲啲都想試吓用。重有,以前李國章住漢園時,嫌官邸個魚池惹蚊,索性將佢填平做埋草坪,所以李局長除咗留低咗狗仔、網球場畀劉校長外,重有一塊綠色嘅草皮㖭。

校長避談新女主人

八方見校長傾得咁開心,當然要問吓佢北上戀情嘅下集,問佢係咪就嚟有新主人入住?點知劉校長即刻好靦覥,話無新女主人入住,重話「謠言止於智者」,叫八方唔好信講嗰個人喎。不過八方好有自知之明,知道自己唔係智者,所以對於呢個「謠言」繼續要八,聽到好多中大人講,佢哋都知道謠言好耐,只係無人敢向校長求證。其實校長年紀唔算大,單身一人都好寂寞,搵個伴又有乜所謂呢?

傳真︰2623-9278
電郵︰pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載