› 選擇地區
三藩市
紐約
洛杉磯
其他美國地區
香港 台灣 北美
 
2005年12月29日

  馬丁籌款要做李八萬 - 李八方

白鴿黨窮,但係要學人扮高檔搞環保,結果出動到前主席馬丁喺一月中帶頭行山籌款,因為佢老哥同部份白鴿仔堅持要繼續搞一個叫做「回收動力」嘅組織,推廣家居廢物分類回收,而呢個組織由○三年成立以嚟,已經勁蝕咗二十五萬大元,真係唔少嘢。
為咗隆重其事,佢哋重出動埋外號「民主黨石修」嘅狄志遠做籌款專員,每位參加者要交入場費二百蚊,而馬丁就加碼,要畀八萬先可以開步,所以佢已經改定個同八方只差一字嘅新外號,就係叫做「李八萬」。
八萬對馬丁嚟講,當然濕濕碎,不過,佢都唔想自己出晒就算,所以叫啲擁躉喺一月八號中午去旺角行人專用區參加「愛環保、撐馬丁、八萬行」喎。馬丁牽頭應該有吸引力嘅,雖然佢連條行山路線圖係點都唔係好知。佢位助理就好清楚,當日會由慈雲山法藏寺起步,經獅子亭,最後抵達沙田博康邨,全程大約兩粒鐘,沿途重有人講解環保知識㖭。

叫煲呔攞出政治家風範

同馬丁講行山路線圖冇意思,但係一講到普選路線圖,佢就成個生晒。佢話,煲呔真係冇鬼用,見到胡主席,都唔敢直接講出香港人(包括佢自己)想盡快普選嘅訴求,乜都好似唔關佢事,只係啲反對政改方案嘅人要求時間表同二○一二年普選啫。「陳四萬叫佢直接講,佢都側側膊,真係令人失望。」
馬丁一邊講,一邊鬧煲呔搞分化,因為胡溫都冇講泛民唔支持政改說破壞溝通,但係煲呔就成日掛喺嘴邊話唔可以當冇事發生過,一味靠嚇。「除非閂埋門講咗嘢我哋唔知啦。」
唉,煲呔又自命係政治家,馬丁話佢應該表現出一啲政治家嘅風範,一係學小泉解散立法會;一係就應該修補大家嘅關係,再搞團結,叫六十個議員或者代表坐低傾吓將來點做,但係佢乜都唔做,一味怪泛民綑綁唔啱,而基本法就係有時間表㗎嘛。
馬丁又話,胡主席成日話要創造條件,同馬力口徑一樣,唔通真係要民建聯贏晒,香港先有機會普選?
早前有人同八方講,中央舊年都諗過普選時間表嘅問題,但因為張超雄無端端話要推動公投,結果搞到中央騰晒雞,改變主意唔肯畀時間表。八方問雄哥信唔信,佢第一個反應係:「我冇咁大影響力呀?」
雄哥唔信呢個講法,因為公投就即係體現民主,如果中央有心想推動民主,冇理由因為香港要搞民主就唔推動,完全唔合邏輯、講完等於冇講。


爆料熱線:29290000、27860099
報料傳真:26239278
報料電郵:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載