› 選擇地區
三藩市
紐約
洛杉磯
其他美國地區
香港 台灣 北美
 
2005年12月19日

  黃英琦叫煲呔呼籲聖誕消費在灣仔 - 李八方

為期六日嘅世貿會議噚日終於閉幕,除咗星期六搞咗單灣仔衝突,要放催淚彈驅散人群,搞到港島部份地區癱瘓咗近十個八個鐘頭之外,都算吉人天相,冇乜大單嘢發生。
煲呔好識做,一清晒場,下晝就走去位於灣仔港灣道體育館嘅警察膳食及支援中心探訪,慰問吓班夥計,重口輕輕話好同情喺灣仔及銅鑼灣嘅商戶,事後會同葉澍堃局長諗吓計,盡量令灣仔盡快回復當日嘅光輝,令人流增加,補償佢哋喺今次事件中受嘅損失喎。
講得咁好聽,八方即時打電話畀灣仔區議會主席Ada黃英琦,問佢有乜要求。原來Ada啱啱去完示威區現場視察咗三個鐘頭,佢話,如果煲呔真係想幫手,就叫佢同所有司局級官員行出嚟,呼籲啲市民,聖誕同新年期間,一定要去銅鑼灣同灣仔。
「叫佢哋帶頭叫番啲人嚟,唔好再叫啲人唔好去灣仔。」Ada好唔開心咁話,最好梗係畀啲錢落嚟美化吓環境,等灣仔同銅鑼灣一帶更吸引。
咁唔使Ada叫出口,八方睇怕煲呔同葉澍堃都識做,搵佢阿姐傾吓有乜方法可以補償啲商戶嘅損失。如果只係行出嚟做宣傳,相信一啲都唔難,連落街簽名支持民建聯都得,呢個要求真係濕濕碎。
嗱!第一個就要叫李少光帶頭,因為係佢口震震叫啲市民唔好去灣仔同銅鑼灣,今次就等佢氣。

今日沙塵日後知死

反正每年聖誕新年,班高官都會請客,今年只准喺灣仔或銅鑼灣設宴。咁東海老闆鍾錦一定拍手掌,佢喺灣仔間海都同東海呢個禮拜拍晒烏蠅啦,好應該補償番。
煲呔講嘢,有時得人驚過水炮,點可以攞解放軍嚟開玩笑,間接自己讚自己,話特區警隊點好點文明,有充份能力應付挑戰。唉,香港警隊係好克制,但你今日咁沙塵,日後求解放軍叔叔幫手就知死。

傳真︰2623-9278
電郵︰pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載