› 選擇地區
三藩市
紐約
洛杉磯
其他美國地區
香港 台灣 北美
 
2005年11月25日

醫界內窺鏡:亂賣廣告 發流感財 - 劉敢針

衞生署早排推廣防流感中藥方,不少醫學界中人都睇唔過眼。

香港人真係識得做生意,最近好多人乘公眾恐慌喺度發禽流感財。
如果大家有注意,市面上近日多咗好多聲稱可以預防流感、增強免疫力嘅醫藥廣告,劉敢針一見到就只好苦笑,因為香港雖然話就話有條不良醫藥廣告條例,但係大家都視若無睹,其實係醫生都知,禽流感對後生同免疫系統強嘅人殺傷性比對老年人大,係咁重去增強免疫力,係咪自找麻煩。
當然市民撲唔到特敏福,就乜都買啲嚟看門口,真係破財未必擋到災。衞生署對呢啲冇確切證明嘅健康食品同中成藥等採取暫時容許嘅態度本來已經有問題,但係最令人不安係佢哋重參與其中,身為監管機構,竟然參與推廣啲冇依「循證醫學」標準嘅藥物,真係好唔應該。

衞生署推廣中藥方不當

事源早前衞生署同中大、港大以及浸大喺一個新聞發布會同互聯網上分別推介防治流行性感冒嘅中藥方,而佢哋卻欠缺確實數據就加以推廣,實在有違科學原則,劉敢針同不少醫學界中人都看不過眼,結果終於有人站出來,就係中大嘅社區醫學教授黃子惠同兒科專科醫生馮錦培,佢哋喺報紙撰文,炮轟當局嘅做法不當,因為冇跟「循證醫學」標準辦事。
兩位專家真勇,指出藥方中嘅中藥並非冇副作用,其實會影響血糖同血壓,亦會導致水腫。
佢哋重質疑,當局如果認為有效,何不推薦畀全世界嘅衞生組織,同國際社會,造福人群?呢個真係問到當局口啞啞。
其實醫藥廣告冇王管不單只係中藥,西藥都一樣。最近某隻西藥喺地鐵大賣廣告話可以醫哮喘,而美國食品及藥物安全管理局上星期就發出警告,叫醫生處方時要特別小心,因為隻藥有副作用,不但對哮喘冇幫助,甚至有死亡個案㖭。
係人都知,賣親廣告梗係只講好處,唔會提副作用,如果直接向市民推銷,而香港又好易喺藥房買到任何處方嘅藥物,咁對公眾真係會構成危險,不容忽視。
劉敢針

傳真︰2623-9278
電郵︰pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載