› 選擇地區
三藩市
紐約
洛杉磯
其他美國地區
香港 台灣 北美
 
2005年10月27日

  曾鈺成棟篤騷幫肥龍出手 - 李八方

曾鈺成:你慚唔慚愧?
設計對白

年年施政報告辯論,壓軸環節都最精采,因為守尾門者,多數都能言善辯,噚日當然唔例外啦,牙尖嘴利嘅曾鈺成一出場,簡直係全日嘅高潮,佢每句每字都鋤到民主派入心入肺幫晒肥龍手,但又不失幽默,要做政治家嘅煲呔,應該向阿曾偷吓師。
究竟阿曾點樣哄動全場?聽聽就知道。佢一開波就話,冇民建聯嘅人恭賀過黃仁龍,佢點都要提一句,費事惹嚟不必要猜測。其後佢開始嚟料,話民建聯盡晒保皇黨責任,對保皇直認不諱,但就借題發揮,話有一位同事寧願跟住特首去加拿大做訪問,都唔出席立法會,質疑佢係扮緊反對派,定係真正嘅保皇黨?唔知身在加拿大嘅大班係咪狂打乞嚏。
大班之後輪到民主黨。達仔批評政府冇搞政黨政治,搞到政黨冇乜空間云云,但係阿曾就話,民主派成日話攞到六成選票,又有廿五個民主派議員,但新議員明明係冇政黨多過有政黨背景,民主黨當然梗係一個新丁都冇,反而佢哋就有喎,大大聲聲問達仔「你慚唔慚愧?」重話唔專注搞政黨發展,正正係「沒落原因」;呢四隻字,真係鏗鏘有聲,達仔聽到,都只能搖頭尷尬苦笑。
阿曾繼續向泛民開火。佢不點名話好多人慷慨激昂話要政黨發展,但有人問到時,就話自己嗰個唔係政黨。真係唔知佢係寸緊一人作戰嘅卿姐,抑或四條A嘅大狀組喇。
講完人梗係講番自己啦,阿曾話民建聯唔係怕執政,只係照吓鏡,知道有得執政都執唔到,所以要發憤圖強,又憶述回歸前民建聯一直被忽視,直至九六年,政府先知佢哋正,最後就委任自己入語常會,講嚟講去,都係叫政黨裝備好自己,先至好要求政府畀位你上啦。
八方見到班官都好留心聽阿曾表演,咁又係,有人咁好幫你反擊,真係多謝都嚟唔切啦。阿曾唔入政府,其實都係政府嘅損失。
俾人窒到一戙都冇嘅達仔,會後竟然話認同阿曾講法,但堅持政黨發展有起有落,叫大家唔好低潮時氣餒。問佢慚唔慚愧?佢就話會盡力做,希望佢真係做到啦。

傳真︰2623-9278
電郵︰pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載