› 選擇地區
三藩市
紐約
洛杉磯
其他美國地區
香港 台灣 北美
 
2005年10月27日

  特區四領導背後的女人 - 李八方

黃仁龍同陳筱茵見到記者好客氣。
《壹周刊》圖片

特首加三司都係男人,以後大家容易溝通好多,特別係三句就有衝動爆粗嘅肥龍,肯定會更放。呢四個男人關係特區安危,要佢哋成功,當然要睇吓佢背後嘅女人係咪添煩添亂一族,係咪同A1有得揮。
四位夫人之中,曾太系出澳門商家,唐太係金泰線廠太子女,許太來自公務員系統,佢哋大家都比較熟識,而仁龍夫人因為新,冇乜人見過佢,好有神秘感,八方都冇乜料,好彩壹仔記者喺新律政司司長外父陳道宣位於壽山村道厚園屋企守候咗三日,終於見到黃夫人陳筱茵嘅廬山真面目,重影咗好多相。佢對記者好客氣謙厚而且醒目,唔畀就快升小一嘅女兒曝光出鏡。

外家有功於共產黨

司長夫人同仁龍係英國劍橋校友,屬高級知識分子,黃太嘅外家來頭好猛。大家都知佢阿爸同鍾士元做拍檔,原來佢阿爺陳厚甫重勁,三十年代喺一間著名嘅德國公司禪臣洋行做買辦,重同一班志同道合者包括黎民偉創立香港第一間電影製作公司「聯華」。聯華首任董事長係何東,董事除陳厚甫,尚有張學良夫人于凰至及中國銀行總經理馮耿光等,吳楚帆第一套戲,就係聯華嘅《夜半輪聲》,女主角係黃曼梨。
喺四九年,陳厚甫重幫過共產黨。嗱,呢段關係就重要啦。當時為咗要突破國民黨重圍,陳厚甫應周恩來同郭沫若嘅指示,協助身在英國嘅著名地質學家李四光經香港返回大陸,幫新中國搞建設。呢一章,大大有功於共產黨。
陳家同共產黨有咁嘅淵源,唔怪得北京咁放心,話仁龍靠外家上位未必公道,但呢個背景,對政途肯定加咗好多分。所以話成功男人背後一定有個女人,陳筱茵就係呢句說話最好例證。

傳真︰2623-9278
電郵︰pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載