蘋果日報 | APPLE DAILY
› 選擇地區
三藩市
紐約
洛杉磯
其他美國地區
2005年07月08日

  許仕仁點解叫肥龍 - 李八方

煲呔、肥龍同任總風塵三俠認真「好腳頭」,一上場撞正倫敦恐怖襲擊,重話有機會再出現亞洲金融風暴,雖然場仗未打到嚟,但係今日個市唔慌好,八方聽聞特區政府睇到好實,一有新發展就向煲呔、肥龍同唐唐報告,睇吓有乜應變措施,話時話,港股噚日下晝都收到料,先跌百幾點。

肥龍冇煲呔咁虔誠

今次恐怖襲擊唔知同宗教有冇關,但係八方知道肥龍同煲呔原來都係天主教徒,煲呔出名虔誠,每日都去教堂,肥龍肯定懶好多。佢同八方講,自己同煲呔唔同,一出世就領洗,唔係大個先信教。
肥龍最近被各傳媒大起底,八方先知佢阿媽係澳門人,咁就明解啦,因為澳門以前係葡萄牙殖民地,所以澳門人多數係天主教徒,肥龍都唔例外,一出世就有個聖名,咪叫Rafael,同佢阿爸一樣。
肥龍雖然冇煲呔咁勤力,不過,唔等於唔會去告解。八方問佢同老婆大人星期日去邊間教堂?佢話梗係要比較清靜啲,有啲澳門教堂feel啦,所以喺華仁或者花園道嘅教堂,你一定見唔到佢。
提起肥龍,佢呢個花名忽然熱爆,好多讀者都𢱑晒頭,連剛收檔嘅競選辦主任李國寶都八卦起嚟,查問許老爺因何有此「雅號」?

有骨精強先有肥龍

八方姑且解吓畫,話說《蘋果日報》95年創刊時,風月版中有一個非常具爭議性嘅專欄,其中有兩個主角,一個叫做「骨精強」,一個叫做「肥龍」,佢哋專門流連港澳煙花之地,熟悉兩地風月行情,風頭一時無兩。
當時,政府有個叫做黎慶寧嘅高官,佢瘦到見骨,於是大家就叫佢做「骨精強」;既然有「骨精強」,邊個做「肥龍」呢?喺高官中,許仕仁個肚腩最大,又鍾意間中同議員講吓兩級半笑話,於是當時重係白鴿黨嘅陳偉業就送咗「肥龍」個朵畀佢。
呢個專欄到𠵱家已成歷史,黎、許亦相繼離開政府,本來再冇人記得呢兩個花名,點知老許忽然復出,「肥龍」個名於是又重現江湖。


爆料熱線:29290000、27860099
報料傳真:26239278
報料電郵:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載